მიკედლებული, მიუსაფარი ცხოველების რეგისტრაციის ერთიანი ბაზა შეიქმნება, რომლის ამოქმედება 2025 წლიდან დაიწყება. შედეგად ქუჩაში გაგდებული ძაღლის პატრონი გვეცოდინება, თუ ვინ არის და ამ კუთხით სანქციები დაწესდება, – ამის შესახებ გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ „ქრონიკაში“ ჩართვისას განაცხადა.
მან „შინაურ ბინადარ ცხოველთა შესახებ“ საქართველოს კანონპროექტის დეტალები კიდევ ერთხელ განმარტა.
მისივე თქმით, ის რეზონანსი, რაც ამ კანონპროექტის განხილვის დაწყებას მოჰყვა, ნათლად მეტყველებს, რომ არის საკითხები რომელიც საზოგადოებას ნამდვილად აწუხებს და ჩვენი ყოველდღიური ცხოვრების ნაწილია. ბითაძემ განმარტა, რომ მიუსაფარი ძაღლებისა და შინაური ცხოველებთან დაკავშირებული პრობლემები ყოველდღიურობას წარმოადგენს.
კომიტეტის თავმჯდომარის განმარტებით, კვლევების თანახმად, მოსახლეობის 56% აცხადებს, რომ ისინი ფლობენ შინაურ ცხოველს, ხოლო ქუჩაში გაგდებული შინაური ცხოველების რაოდენობა ძალიან დიდია და იგი აჭარბებს სტერილიზაცია-კასტრაციის სახელმწიფო პროგრამით გათვალისწინებული ცხოველების რაოდენობას.
„წლების განმავლობაში, ერთიან საკანონმდებლო სივრცეში არ არსებობდა აქტი, წინა მოწვევის პარლამენტში იყო რამდენიმე მცდელობა, რომ მსგავსი კანონპროექტი ყოფილიყო განხილული, მაგრამ საბოლოო ჯამში, იქიდან გამომდინარე, რომ პროცედურული ნაწილები აკლდა ამ კანონპროექტებს, მისი განხილვა ვერ შედგა.
ამ კანონპროექტზე 60-მდე კოლექტიური და ინდივიდუალური შეხვედრა გვქონდა და საკმაოდ ხმაურიანი, რადგან ზოგად პრინციპებზე შეჯერება ძალიან რთული იყო.
კანონპროექტი მთავარი მიზანია, ცხოველის მიკვლევადობის ციფრული სისტემის შექმნა, სადაც ჩართული იქნება ყველა ის სუბიექტი, ვეტერინარული კლინიკა, საშენი, მუნიციპალური თუ კერძო თავშესაფარი, სადაც ცხოვრების ციკლის განმავლობაში ხვდება ცხოველი. საბოლოო ჯამში, ჩიპირებისა და მიკედლებული, მიუსაფარი ცხოველების რეგისტრაციის ერთიანი ბაზა შეგვექმნება, რომლის ამოქმედება 2025 წლიდან დაიწყება. შედეგად ქუჩაში გაგდებული ძაღლის პატრონი გვეცოდინება, თუ ვინ არის და ინიცირებულ ვერსიაში სანქციები ამ კუთხით საკმაოდ მაღალია“, – განაცხადა ბითაძემ.
მისივე თქმით, ასევე, გაკონტროლდება ცხოველების გამრავლებაც, რომელიც დღეს აბსოლუტურად უკონტროლოდ ხდება.
„შინაურ ბინადარ ცხოველთა შესახებ“ საქართველოს კანონპროექტის საჯარო პრეზენტაცია პარლამენტში დღეს გაიმართა.