გაეროს ადამიანის უფლებათა ოფისი აცხადებს, რომ შეძრწუნებულია ალექსეი ნავალნის გარდაცვალების შესახებ გავრცელებული ინფორმაციით და დასძინა, რომ მისი გარდაცვალება დამოუკიდებელმა ორგანომ უნდა გამოიძიოს.
“თუ ვინმე იღუპება სახელმწიფოს პატიმრობაში, ვარაუდი არის, რომ სახელმწიფო პასუხისმგებელია. პასუხისმგებლობის უარყოფა შესაძლებელია მხოლოდ დამოუკიდებელი ორგანოს მიერ განხორციელებული მიუკერძოებელი, საფუძვლიანი და გამჭვირვალე გამოძიებით”, – ნათქვამია გაეროს ადამიანის უფლებათა ოფისის განცხადებაში.
რუსი ოპოზიციონერი, ალექსეი ნავალნი სასჯელაღსრულების დაწესებულებაში გარდაიცვალა. ის 47 წლის იყო. რუსეთის ფედერალური სასჯელაღსრულების სამსახურის ცნობით, 16 თებერვალს, ნავალნი სეირნობის შემდეგ ცუდად გახდა, რის შემდეგაც მან გონება დაკარგა. უწყების განმარტებით, მედიკოსებმა მას ყველა საჭირო პროცედურა ჩაუტარეს, თუმცა უშედეგოდ.