ინდოეთმა ორთვიანი პაუზის შემდეგ Sokol-ის ტიპის რუსული ნავთობის იმპორტი განაახლა. ამის შესახებ წყაროებზე დაყრდნობით Reuters-ი იტყობინება.
მისი ინფორმაციით, ინდოეთის სულ მცირე ორ ნავთობგადამამუშავებელ ქარხანაში თებერვალში Sokol-ის ტიპის რუსული ნავთობი შევიდა. ინდური კომპანია Hindustan Petroleum Corp (HPCL) ნავთობს ტრეიდერისგან ყიდულობს და, დიდი ალბათობით, მის საფასურს არაბთა გაერთიანებული საამიროების დირჰამებში გადაიხდის. ასევე, Sokol-ის ტიპის რუსული ნავთობის პარტია მიიღო კომპანია Nayara Energy-მ, რომლის აქციების საკონტროლო პაკეტიც რუსულ კომპანიებს, მათ შორის „როსნეფტს“ ეკუთვნის.
London Stock Exchange Group (LSEG)-ის მონაცემებით, გემი Seagull, რომელიც 95 ათასი ტონა Sokol-ის ტიპის ნავთობით იყო დატვირთული, რამდენიმე დღის წინ მუმბაის პორტში შევიდა. ამავე ტიპის ნავთობით დატვირთული კიდევ სამი გემი – NS Lion, NS Arctic და Raven – ინდოეთში, კერძოდ კი პარადიპისა და ვიშაკჰაპატნამის პორტებში თვის ბოლომდე შევა.