მცხეთა-მთიანეთში სადაც უხვმა ნალექმა პრობლემები შექმნა ზარალს ითვლიან. დატბორილია სახლები, გზები და საკარმიდამო ნაკვეთები, რამდენიმე სოფელს ელექტროენერგიის მიწოდებაც შეუწყდა.
სტიქიურმა პროცესებმა მნიშვნელოვნად დააზარალა წეროვანის დევნილთა დასახლება, თიანეთისა და დუშეთის მუნიციპალიტეტების ადმინისტრაციული ერთეულები და მცხეთის მუნიციპალიტეტის სხვა სოფლები. დაზარალებულ მოსახლეობას ალტერნატიული საცხოვრებლებით უზრუნველყოფენ.
სტიქიის ზონებში იმყოფებოდნენ თვითმმართველობის წარმომადგენლები, მათ შორის მცხეთა-მთიანეთის მხარის სახელმწიფო რწმუნებული, მცხეთის მერი და ახალგორის გამგებელი. რამდენიმედღიანი გადაუღებელი წვიმების შედეგად, რეგიონის სხვადასხვა ლოკაციაზე დაიტბორა საცხოვრებელი სახლები, შიდა საუბნო გზები, დაზიანდა ხიდ-ბოგირები, ელექტროგადამცემი ხაზები, ასევე, დაიტბორა საკარმიდამო ნაკვეთები და სასოფლო-სამეურნეო სავარგულები.
შექმნილია სტიქიისგან მიყენებული ზარალის დამთვლელი კომისიაც.