საზოგადოებისთვის სასარგებლო პროექტების, ზოგიერთი ოპოზიციური პოლიტიკური პარტიის ლიდერის მიზანმიმართული ხელშეშლის და საბოტაჟის მიუხედავად, ონის მუნიციპალიტეტის მერია სრულად დააფინანსებს მუნიციპალიტეტში მცხოვრები 2-დან 18 წლამდე ბავშვებისა და მოზარდებისთვის უფასო სტომატოლოგიური მომსახურებას, – ამის შესახებ ინფორმაციას ონის მუნიციპალიტეტის მერი სერგი ხიდაშელი ავრცელებს.
„ცენტრალური და ადგილობრივი ხელისუფლება ორიენტირებულია მოქალაქეების საჭიროებებზე, სწორედ ცენტრალურ მთავრობასთან კოორდინირებული მუშაობით ონში სტომატოლოგიური კლინიკა აუცილებლად გაიხსნება! სრული პასუხისმგებლობით ვაცხადებ, რომ აღნიშნული პროექტის შეფერხების საფრთხე არ არსებობს. პროექტის განხორციელებისთვის, ადგილობრივი 2024 წლის ბიუჯეტიდან გამოყოფილია 57 000 ლარი. ფონდმა „ფეა თრიიზმა“ მოგვმართა განცხადებით იდეის დონეზე, რომ განხორციელებულიყო პროექტი ონის მუნიციპალიტეტში, ჩვენ ცენტრალურ ხელისუფლებასთან ერთად დავიწყეთ ამ პროექტზე მუშაობა, გავატარეთ შესაბამისი ზომები და როდესაც საკითხი დასასრულისკენ მივიყვანეთ და აქტიურ ფაზაში იყო პროექტის განხორციელება, ფონდმა განაცხადა უარი, მათი მხრიდან რბილად, რომ ვთქვათ, ეს არის უპასუხისმგებლო საქციელი და შეურაცხყოფა ჩვენი და ჩვენი მოქალაქეების,“ – აცხადებს სერგი ხიდაშელი.
ერთ-ერთ მედია საშუალებაში გავრცელდა ინფორმაცია იმის შესახებ, რომ ფონდი „ფეა თრიიზი“ ონში ბავშვთა სტომატოლოგიური კლინიკის გახსნის პროექტს აჩერებს. მიზეზად კი „უცხოური გავლენის გამჭვირვალობის შესახებ“ კანონის მიღებას ასახელებენ. ამასთან, ფონდ „ფეა თრიიზის” ვებგვერდზე ბორდის წევრთა ჩამონათვალში იყო პარტია „ლელოს“ ერთ-ერთი ლიდერი ბადრი ჯაფარიძე. თუმცა, „იმედის“ მიერ ამ ინფორმაციის გამოქვეყნების შემდეგ „ფეა თრიიზმა“ ბადრი ჯაფარიძე ვებ-გვერდზე ბორდის წევრების სიიდან წაშალა და ახლა მისი მონაცემები აღარ იძებნება.