გუშინ ღამით მომხდარი მიწისძვრის შემდეგ საგანგებო სიტუაციების მართვის სამსახურსა და ონის მერიაში 20-მდე შეტყობინება შევიდა. ამის შესახებ ონის მუნიციპალიტეტის მერმა სერგო ხიდეშელმა განაცხადა.
„დღეს დილიდან ონის მუნიციპალიტეტის შესაბამისი სამსახურები, ასევე მერის წარმომადგენლები სხვადასხვა თემში ახორციელებენ მონიტორინგს ზარალის დათვლასთან დაკავშირებით. დაახლოებით 20-მდე შეტყობინება არის შემოსული საგანგებო სიტუაციების მართვის სამსახურსა და ონის მერიაში. ხდება დაუყოვნებლივ ადგილზე მისვლა და ვითარების გაცნობა. რაც შეეხება დაზიანებებს, ძირითადად ეს არის სახლებზე ბზარების გაჩენა. შესაბამისი კომისიის მიერ შესწავლის შემდეგ მოხდება ზარალის დათვლა და კანონით განსაზღვრული შესაბამისი ქმედებების განხორციელება“, – განაცხადა სერგო ხიდეშელმა.
ბიძგები წუხელ, თბილისის დროით 02:03 საათზე დაფიქსირდა. სეისმური მონიტორინგის ეროვნული ცენტრის მონაცემებით, ეპიცენტრი ქალაქი ონიდან სამხრეთ-აღმოსავლეთით, სოფელი ირთან იყო. მიწისძვრის სიძლიერემ 5.4 მაგნიტუდა შეადგინა.