აშშ-ის სახელმწიფო დეპარტამენტში აცხადებენ, რომ არ იციან, ვინ არის პასუხისმგებელი ლიბანში მომხდარ აფეთქებებზე.
სახელმწიფო დეპარტამენტის სპიკერის, მეთიუ მილერის თქმით, შეერთებული შტატები აგროვებს ინფორმაციას აფეთქებასთან დაკავშირებით, ამიტომ მეტ დეტალზე ვერ ისაუბრებს.
„შეერთებული შტატები მომხდარში ჩართული არ ყოფილა. შეერთებულ შტატებს წინასწარ არ ჰქონდა ინფორმაცია ამ ინციდენტის შესახებ. მინდა, ძალიან ნათლად განვაცხადო, რომ არ ვისაუბრებ კონკრეტულ დეტალებზე ამ ინციდენტთან დაკავშირებით, რადგან ჩვენ კვლავ ვაგროვებთ ინფორმაციას ამის შესახებ. მაგრამ ზოგადად, დიახ, რა თქმა უნდა, ჩვენ მხარს ვუჭერთ ოპერაციებს, რომლებიც მიმართულია „ჰეზბოლას“ მებრძოლების წინააღმდეგ, რომლებიც განაგრძობენ ტერორისტულ თავდასხმებს სამოქალაქო პირებზე“, – განაცხადა მეთიუ მილერმა.
ცნობისთვის, ლიბანში მომხდარი პეიჯერების აფეთქებების შედეგად მსხვერპლის რიცხვი ცხრამდე გაიზარდა, ხოლო 2 800-მდე ადამიანი დაშავებულია. კოორდინირებული აფეთქებების შედეგად შვიდი ადამიანი დაიღუპა სირიაშიც. გაერო-ში აცხადებენ, რომ ლიბანის მოვლენები „უკიდურესად შემაშფოთებელია“.