პარლამენტის თავმჯდომარე შალვა პაპუაშვილი პარლამენტის წევრებთან, ირაკლი ქადაგიშვილთან და გურამ მაჭარაშვილთან ერთად, ლაგოდეხის მუნიციპალიტეტში, ტრადიციულ სახალხო დღესასწაულს „ჰერეთობა-2024“ დაესწრო.
„დღეს, ლაგოდეხში „ჰერეთობა“ აღინიშნება, ამ მშვენიერი კუთხის დიდი დღესასწაული. დღე, რომელიც აერთიანებს საქართველოს სხვადასხვა კუთხის შვილებს და ლაგოდეხში ეს ერთობა განსაკუთრებულად იგრძნობა. ყველას ვულოცავ ამ დღესასწაულს“, – განაცხადა შალვა პაპუაშვილმა.
საზეიმო ღონისძიებები მთელი დღის განმავლობაში მიმდინარეობდა. ჩატარდა სხვადასხვა კულტურულ-შემეცნებითი და გასართობი ღონისძიება.
ღონისძიების მონაწილეებს შესაძლებლობა ჰქონდათ დაეგემოვნებინათ ადგილობრივი ღვინის მეწარმეების მიერ წარმოდგენილი ღვინოები და საქართველოს სხვადასხვა კუთხის სამზარეულოს კერძები. ასევე, გაიმართა ხელნაკეთი ნივთების გამოფენა/გაყიდვა.
სადღესასწაულო ღონისძიებაზე, ლაგოდეხის საპატიო მოქალაქეები დაჯილდოვდნენ.
სახალხო დღესასწაული გალა კონცერტით დასრულდა.