ჩვენი პარტია თუ დათანხმდებოდა ის როლი შეესრულებინა, რა როლსაც ასრულებს ოპოზიცია, ანუ ჩაითრევდა სამხედრო ავანტიურაში საქართველოს, დიდი სიამოვნებით გაგვიხსნიდნენ კარს, გულს და ყველაფერს და პირადი კეთილდღეობა ათჯერ უფრო გაიზრდებოდა, – განაცხადა საპარლამენტო უმრავლესობის წევრმა, თენგიზ შარმანაშვილმა გადაცემა „იმედი LIVE“-ში.
წამყვანმა მას ჰკითხა, ელოდება თუ არა, რომ ევროკავშირი უვიზო მიმოსვლას დროებით შეაჩერებს.
„დარწმუნებული ვარ, რომ ამ ნაბიჯს [უვიზო მიმოსვლის შეჩერება] ევროკავშირის ქვეყნები არ გადადგამენ. თქვენ იცით, რომ მათი ლიდერები იკრიბებიან. ისინი იღებენ ამ გადაწყვეტილებას. რაც შეეცდება ჩვენს დასანქცირებას, ან უფრო მაღალი თანამდებობის პირების, იმთავითვე განვაცხადეთ, რომ ჩვენ ამისთვის მზად ვართ და საქართველოს მომავლისთვის, იმის გამო, რომ პირადად რამე არ შეგვეხოს სანქციებთან დაკავშირებით, უკან არ დავიხევთ და საქართველოს ინტერესებს არ ვუღალატებთ.
რა გგონიათ, ვინმე ოპოზიციონერზე ამოსდის ამ ხალხს [ევროპელ პოლიტიკოსებს] მზე და მთვარე?! არა, რა თქმა უნდა. ჩვენი პარტია თუ დათანხმდებოდა ის როლი შეესრულებინა, რა როლსაც ასრულებს ოპოზიცია, ანუ ჩაითრევდა სამხედრო ავანტიურაში საქართველოს, დიდი სიამოვნებით გაგვიხსნიდნენ კარს, გულს და ყველაფერს და პირადი კეთილდღეობა ათჯერ უფრო გაიზრდებოდა ჩვენი, პირადი დივიდენდები. ჩვენ ასე არ ვცხოვრობთ, ასე არ გვიცხოვრია და არც ასე ვაპირებთ ცხოვრებას. საქართველოს საზიანოდ არანაირი მუქარის ქვეშ არცერთ ნაბიჯს არ გადავდგამთ“, – აღნიშნა შარმანაშვილმა.