ისრაელის პრემიერ-მინისტრი ბენიამინ ნეთანიაჰუ აცხადებს, რომ „ჰამასთან“ მძევლების საკითხზე მიმდინარე მოლაპარაკებებში გარკვეული პროგრესი არის მიღწეული, თუმცა, ნეთანიაჰუს თქმით, არ იცის, რამდენი ხანი დასჭირდება შედეგების დანახვას.
ქნესეთში სიტყვით გამოსვლისას ნეთანიაჰუმ განაცხადა, რომ ისრაელმა რამდენიმე ფრონტზე სამხედრო თვალსაზრისით დიდ წარმატებებს მიაღწია და რომ „ჰამასზე“ სამხედრო ზეწოლამ მისი ლიდერები აიძულა, შეერბილებინათ თავიანთი მოთხოვნები.
„არის პროგრესი. არ ვიცი, რამდენ ხანს გასტანს. ჩვენ გავაგრძელებთ მოქმედებას ნებისმიერი გზით და შეუჩერებლად, ვიდრე ყველას არ დავაბრუნებთ სახლში მტრის მიწიდან“, – განაცხადა ნეთანიაჰუმ.
ისრაელის პრემიერ-მინისტრის თქმით, ისრაელმა განიმტკიცა თავისი პოზიცია როგორც რეგიონულმა ძალამ და რომ გეგმავს აბრაამის შეთანხმებების გაფართოებას ისრაელის ამერიკელ მეგობრებთან ერთად.