სხვადასხვა „ტეტ ა ტეტ“ შეხვედრაზე ჩვენ აბსოლუტურად ყველა გვეუბნებოდა, რომ იმის მტკიცებულებები ვერ მივიღეთ, რომ არჩევნები გაყალბდაო, გულისხმობდნენ ჩვენი ექსტრემისტი ოპოზიციის მხრიდან [წარმოდგენილ მტკიცებულებებს], – განუცხადა პარლამენტის ვიცე-სპიკერმა ევროსაბჭოს საპარლამენტო ასამბლეაზე საქართველოს დელეგაციის ხელმძღვანელმა, თეა წულუკიანმა „ქრონიკას“.
მისი თქმით, საქართველოს საპარლამენტო დელეგაცია წყვეტს ევროსაბჭოს საპარლამენტო ასამბლეაში მონაწილეობას და მუშაობას განაახლებს მხოლოდ მას შემდეგ, რაც შეიცვლება უსამართლო დამოკიდებულება ქართული სახელმწიფოს და ქართველი ხალხის მიმართ.
„ჩვენთვის უფლებამოსილების აღიარება, ცნობა უმნიშვნელოვანესი იყო იმის სათქმელად, რომ თუ ჩვენ არ ვართ არჩეულნი და ვიტყუებით, თუ მილიონ 200 ათასამდე ადამიანი ბუნებაში არ არსებობს და ეს ჩვენ გამოვიგონეთ, მაშინ როგორ შეიძლება ასეთი პარლამენტის თუნდაც ერთ წევრს შენ დაელაპარაკო, სხდომებზე სიტყვით გამოსვლის უფლება მისცე და მერე უღიარო უფლებამოსილება. ე.ი. არ ყოფილა სინამდვილეში პრობლემა. უფრო მეტიც, სხვადასხვა „ტეტ ა ტეტ“ შეხვედრაზე ჩვენ აბსოლუტურად ყველა გვეუბნებოდა, რომ იმის მტკიცებულებები ვერ მივიღეთ, რომ არჩევნები გაყალბდაო, გულისხმობდნენ ჩვენი ექსტრემისტი ოპოზიციის მხრიდან [წარმოდგენილ მტკიცებულებებს], მაგრამ რაკი კითხვის ნიშნებია, ამდენი აურზაური, სჯობს ახალი არჩევნები ჩატარდესო. სამართლიანობისთვის უნდა ვთქვა, რომ იყო მხოლოდ ერთი ადამიანი, „იპიპის“ წარმომადგენელი, ძალიან წონიანი ფიგურა, მან მითხრა, რომ გასაგებია, რომ არ არის მტკიცებულებები, მაგრამ არ მჯერა, რომ [არჩევნები] არ გაყალბდაო. ეს მისი მხრიდან გულახდილი და პატიოსანი ნათქვამი იყო. რაკი მტკიცებულებები არ არის, ყველა ჩუმად თვლის, რომ ჩვენს პარლამენტს ლეგიტიმაციის პრობლემა არ აქვს, ყველა თვლის, რომ ნუღარ გვინდა ამდენი ხმაური და ახალი არჩევნები გავაკეთოთ. ეს ასე არ ხდება. ჩვენი ქვეყანა სათამაშო არ არის. ჩვენი ქვეყნის სუვერენიტეტი სისხლით არის მოპოვებული და ჩვენ პირველ რიგში ამას ვცემთ პატივს, ჩვენს ამომრჩეველს და საკუთარ თავს.
აღიარეს უფლებამოსილება? – აღიარეს. დააყენა ბრიტანულმა დელეგაციამ ჩვენი ოპოზიციის წაქეზებით კენჭისყრაზე, რომ არ ეცნოთ ჩვენი [„ქართული ოცნების“] უფლებამოსილება? – დააყენა. ჩავარდა და ჩაფლავდა? – ჩაფლავდა. ასე რომ, ამ მხრივ, ვართ თუ არა ლეგიტიმური დელეგაცია, კითხვის ნიშანი ვეღარ გაჩნდება. სანამ ეს ყველაფერი გადაივლის და ყველა, ვინც ჩვენს წინააღმდეგ მისცა ხმა აქ [ევროსაბჭოს საპარლამენტო ასამბლეაში], დამშვიდდება, დაწყნარდება, დასერიოზულდება, მოისურვებს ფაქტების შესწავლას, მტკიცებულებებით ჩვენთან საუბარს, შემდეგ ჩვენ აქ მონაწილეობას, თუ ეს მოხდება, განვაახლებთ. მანამდე არანაირი აზრი არ აქვს“ , – აღნიშნა წულუკიანმა.