მაღალმთიან აჭარაში დიდთოვლობამ პრობლემები შექმნა. როგორც აჭარის ავტონომიური რესპუბლიკის მთავრობის ხელმძღვანელმა, თორნიკე რიჟვაძემ განაცხადა, ყველა ადმინისტრაციულ ერთეულამდე გზის გაწმენდითი სამუშაოები მიმდინარეობს.
მისივე თქმით, ასევე მუშაობა მიმდინარეობს ელექტრომომარაგების კუთხით შეფერხებების აღმოსაფხვრელად.
„უხვმა ნალექმა, თოვლმა პრობლემები შექმნა მაღალმთიან აჭარაში. შესაბამისად, მიმდინარეობს ყველა ადმინისტრაციულ ერთეულამდე გზის გაწმენდითი სამუშაოები. შეფერხებებია ელექტრომომარაგების კუთხით, თუმცა კოორდინირებულად ვმუშაობთ, როგორც ცენტრალურ საავტომობილო დეპარტამენტთან, ასევე ყველა ენერგოკომპანიასთან ერთად, რათა მოქალაქეებს მინიმალური პრობლემები შეექმნათ“, – განაცხადა თორნიკე რიჟვაძემ.
ამასთან, ბათუმში, თამარის დასახლებაში წყალმომარაგების მაგისტრალური მილი ავარიულად დაზიანდა, რასთან დაკავშირებითაც სამუშაოები მიმდინარეობს.