გურიის რეგიონში, როგორც მოგეხსენებათ, საკმაოდ სერიოზული პრობლემები შექმნა დიდთოვლობამ, თუმცა სტიქიის პირველივე დღიდან მობილიზებულია ყველა შესაბამისი სამსახური. შექმნილია სპეციალური შტაბი, ყოველდღიურ რეჟიმში აქტიურ კომუნიკაციაში ვიმყოფებით ჩვენს მოქალაქეებთან, – განაცხადა გადაცემა „დღის ქრონიკაში“ გურიის მხარეში სახელმწიფო რწმუნებულმა გიორგი ურუშაძემ.
მისივე თქმით, ფუნქციონირებს ცხელი ხაზი.
„ყველა უწყება, ყველა სამსახური მუშაობს 24 საათიან უწყვეტ რეჟიმში, თუმცა ამინდის პროგნოზი ყოველდღიურად იცვლება. საკმაოდ რთული ვითარება და რთული მეტეოროლოგიური მდგომარეობა გვაქვს რეგიონში. ძალიან დიდი ნალექი მოვიდა.
სამწუხაროდ, არსებობს ისეთი სოფლები, სადაც ჯერჯერობით გადაადგილება ვერ ხერხდება, თუმცა ინტენსიურად მიმდინარეობს როგორც ცენტრალური, ასევე შიდა სასოფლო გზების გაწმენდითი სამუშაოები. ასევე, 24 საათიან რეჟიმში მუშაობენ როგორც „სოკარის“, ასევე „ენერგო პრო ჯორჯიას“ თანამშრომლები“, – აღნიშნა გიორგი ურუშაძემ.
მისივე თქმით, სამივე მუნიციპალიტეტში არის საკმაოდ დიდი ნალექი.
„სამივე მუნიციპალიტეტი არის ერთნაირად ამ გამოწვევის წინაშე, თუმცა როგორც მოგეხსენებათ, საქართველოს პრემიერ-მინისტრის გადაწყვეტილებით, უკვე დამატებით კიდევ ჩაერთო თავდაცვის ძალები ამ სამაშველო ღონისძიებებში. შესაბამისად, ყველა ღონეს ვიყენებთ, რათა მაქსიმალურად მოკლე დროში და ეფექტურად მოხდეს იმ პრობლემების გადაჭრა, რომლებიც ჩვენი მოქალაქეების წინაშე დგას“, – აღნიშნა მან.