ბათუმში თოვლისგან ქუჩების გაწმენდითი ღონისძიებები მთელი ღამის განმავლობაში მიმდინარეობდა. სამუშაოებში ჩართულია როგორც მუნიციპალური, ასევე დაქირავებული სპეცტექნიკა.
შეფერხება დაფიქსირდა წყალმომარაგების კუთხით, დაზიანდა ცენტრალური მილი, თუმცა აღდგენითი სამუშაოები უკვე დასრულებულია და ყველა აბონენტს ეტაპობრივად მიეწოდება სასმელი წყალი.
იყო გამოწვევა ბუნებრივი აირისა და ელექტროენერგიის მიწოდების მიმართულებით, რაც მოგვარებულია.
ქალაქის მასშტაბით რამდენიმე მისამართზე სახურავები და საჩრდილობლები დაზიანდა. ერთი ოჯახი გადაყვანილია უსაფრთხო ადგილზე, ხოლო ბინათმესაკუთრეთა ამხანაგობების სახურავების აღდგენაში მუნიციპალიტეტი ჩაერთვება.
„მთელი რამის განმავლობაში ინტენსიურად მიმდინარეობდა თოვლის საფარისაგან გზების გაწმენდითი სამუშაოები. მასშტაბურად ჩართულია როგორც მუნიციპალური, ასევე დაქირავებული ტექნიკა, მნიშვნელოვანია, რომ წყალმომარაგების ნაწილში შექმნილი იყო შეზღუდვა და წყალმომარაგება გვიან ღამით აღდგა. გზის გაწმენდის სამუშაოები რა თქმა უნდა, გაგრძელდება”, – განაცხადა ბათუმის მერმა არჩილ ჩიქოვანმა.
სწავლა შეჩერებულია სკოლამდელი აღზრდის დაწესებულებებში, რომელიც 27 თებერვალს განახლდება.