ქობულეთის მუნიციპალიტეტში, 6 დღის განმავლობაში, იყო ინტენსიური თოვა, აქტიურად მუშაობდა ყველა შესაბამისი უწყება, მოსახლეობასთან ადგილობრივი მუნიციპალიტეტის წარმომადგენლები იყვნენ მუდმივ კომუნიკაციაში, მოქმედებდა შტაბი, ცხელი ხაზი და არც ერთი შეტყობინება რეაგირების გარეშე არ დაგვიტოვებია, – განაცხადა ქობულეთის მუნიციპალიტეტის მერმა ლევან ზოიძემ ჟურნალისტებთან.
მისივე თქმით, აქტიურად მიმდინარეობს გზის გაწმენდითი სამუშაოები და მას შემდეგ, რაც დღის განმავლობაში ადმინისტრაციულ ერთეულებში დასრულდება აღნიშნული პროცესი, ეტაპობრივად გაიწმინდება შიდა სასოფლო გზები. ლევან ზოიძის განცხადებით, ელექტროენერგია უკვე აღუდგა მოსახლეობის დიდ ნაწილს და ინტენსიურად მიმდინარეობს სამუშაოები, რათა დარჩენილ აბონენტებსაც მაქსიმალურად მოკლე ვადებში მიეწოდოთ ელექტროენერგია და ბუნებრივი აირი.
„ქობულეთის მუნიციპალიტეტში, 6 დღის განმავლობაში, იყო ინტენსიური თოვა. თოვლის საფარი ზოგიერთ სოფელში 2 მეტრს აღემატებოდა. აქტიურად მუშაობდა ყველა შესაბამისი უწყება. მოსახლეობასთან ადგილობრივი მუნიციპალიტეტის წარმომადგენლები იყვნენ მუდმივ კომუნიკაციაში, მოქმედებდა შტაბი, ცხელი ხაზი და არც ერთი შეტყობინება რეაგირების გარეშე არ დაგვიტოვებია. უკვე გაწმენდილია ყველა ადმინისტრაციული ერთეული, მიმდინარეობს ბოლო ადმინისტრაციული ერთეულის გაწმენდა, რომელიც დღეს დასრულდება და როგორც კი მოვრჩებით მთავარი გზების გაწმენდით სამუშაოებს, შემდეგ უკვე ეტაპობრივად გადავალთ შიდა სასოფლო გზების გაწმენდით სამუშაოებზე. ასევე ვმოქმედებთ კონკრეტული გეგმის მიხედვით, გამოყოფილი გვაქვს სპეციალური ტექნიკა, კოორდინირებულად ვმუშაობთ. როდესაც შემოდის ზარი სამედიცინო დაწესებულებაში გადასაყვან პაციენტზე, ყველა ასეთ შემთხვევაში ხდება რეაგირება. პაციენტები გადაგვყავს შესაბამის დაწესებულებებში. სტიქიის შედეგად, თავდაპირველად მუნიციპალიტეტში 10 000 ადამიანს არ მიეწოდებოდა ელექტროენერგია, ამ დროისათვის აღდგენილია და დარჩენილია მხოლოდ 900-მდე აბონენტი. შესაბამისი სამსახურები მუშაობენ, რომ ამ აბონენტებსაც მაქსიმალურად მოკლე ვადებში მიეწოდოთ ელექტროენერგია. სირთულეს წარმოადგენდა მაღალი თოვლი, ტექნიკას უჭირდა გადაადგილება დაზიანებულ ადგილებამდე, დღეს უკვე მაქსიმალურად ინტენსიურად იმუშავებენ შესაბამისი სამსახურები, რომ აღნიშნულ ოჯახებს მიეწოდოთ ელექტროენერგია.
გარკვეული შეფერხებები იყო ბუნებრივ აირთან დაკავშირებითაც, ამ ეტაპზე, შეფერხება აქვს 900-მდე აბონენტს, აქაც იწმინდება ის ლოკაციები, სადაც იყო დაზიანება, გასულები არიან ჯგუფები და მიდის აღდგენითი სამუშაოები,“- განაცხადა ქობულეთის მუნიციპალიტეტის მერმა.
მისივე თქმით, ძლიერი ნალექის შედეგად დაზიანდა 70-ზე მეტი სახლი, მოსახლეობა უსაფრთხო ადგილასაა გადაყვანილი და ზიანის ანაზღაურების საკითხს სტიქიის სალიკვიდაციო კომისია შეისწავლის.
„ძლიერი ნალექის შედეგად დაზიანდა 70-ზე მეტი სახლი, სადაც ჩამოინგრა ჭერი. ჩვენ გასულები ვიყავით თითოეულთან ადგილზე, მოსახლეობა უსაფრთხო ადგილას არის გადაყვანილი. აღნიშნულ საკითხს შეისწავლის სტიქიის სალიკვიდაციო კომისია და თითოეულ მოქალაქეს დავუდგებით გვერდში და დავეხმარებით აღნიშნული ზიანის ანაზღაურებაში“, – განაცხადა ლევან ზოიძემ.