ფაქტობრივად, უკვე დასკვნით ფაზაშია სტიქიის სალიკვიდაციო სამუშაოები, – განაცხადა გურიის მხარეში სახელმწიფო რწმუნებულმა გიორგი ურუშაძემ.
მისი თქმით, ელექტროენერგიის მიწოდების პრობლემა აღმოფხვრილია, ხოლო გაზმომარაგების გარეშე ძალიან მცირე რაოდენობის აბონენტია დარჩენილი.
როგორც გიორგი ურუშაძემ აღნიშნა, საჭიროების შემთხვევაში, მოქალაქეებს ინტენსიურად მიეწოდებათ საკვები პროდუქტები და მედიკამენტები.
„ან დღის ბოლოს, ან ხვალისთვის ჩვენ შევძლებთ, რომ ერთ-ერთი კრიტიკული მონაკვეთის – სურების მიმართულებით გზა უკვე სრულად გავხსნათ. ფაქტობრივად, რეგიონის მასშტაბით ელექტროენერგიის მიწოდების პრობლემა აღმოფხვრილია, ხოლო ბუნებრივი აირის მიწოდებას რაც შეეხება, გვაქვს გარკვეული წერტილოვანი შეზღუდვები. ძალიან მცირე რაოდენობის აბონენტები არიან დარჩენილი გაზმომარაგების გარეშე და აქაც ინტენსიური მუშაობა მიმდინარეობს. ინტენსიურად მიეწოდებათ საკვები პროდუქტები და მედიკამენტები იმ მოქალაქეებს, რომელთაც ამის საჭიროება აქვთ. მიკროშტაბები აქტიურ რეჟიმში განაგრძობენ მუშაობას და ეს პროცესი გაგრძელდება მანამდე, სანამ სტიქიის სალიკვიდაციო სამუშაოები არ დასრულდება“, – აღნიშნა ურუშაძემ.