პოლიტიკური გაერთიანება ,,ქართული ოცნება-დემოკრატიული საქართველოს“ გორგასლის ოფისში საპარლამენტო უმრავლესობის სხდომა გაიმართა.
უმრავლესობის წევრებმა მიმდინარე კვირის დღის წესრიგზე იმსჯელეს.
ერთ-ერთი მთავარი საკითხი იყო FARA-ს კანონი. იურიდიულ საკითხთა კომიტეტმა კანონპროექტს – „უცხოური აგენტების რეგისტრაციის აქტი“ პირველი მოსმენით მხარი დაუჭირა.
სხდომაზე განიხილეს და უმრავლესობის მხარდაჭერა ექნება „სისხლის სამართლის კოდექსში“ ცვლილებას, რომელიც სამშობლოს ღალატისთვის სისხლისსამართლებრივი პასუხისმგებლობის საკითხს უკავშირდება.
ასევე, საუბარი შეეხო „მაუწყებლობის შესახებ“ საქართველოს კანონში ცვლილების შეტანის საკითხს.
სხდომაზე მიღებული გადაწყვეტილებით საჯარო სამსახურში იკრძალება უცხოური წყაროდან სარგებლის მიღება.
სხდომაზე საუბარი შეეხო საჯარო სამართლის იურიდიული პირის ხელმძღვანელის და მოადგილის დანიშვნა/გათავისუფლებას, რასაც უმრავლესობის მხარდაჭერა ექნება. ცვლილების შედეგად, „აღნიშნულ თანამდებობებზე პირების დანიშვნა შესაბამისი სახელმწიფო ზედამხედველობის განმახორციელებელი ორგანოს ან იმ უწყების ხელმძღვანელის პრეროგატივა იქნება, რომლის მმართველობის სფეროშიც შედის ესა თუ ის კონკრეტული საჯარო სამართლის იურიდიული პირი“.
სხდომაზე ასევე განიხილეს თეატრის ხელმძღვანელის დანიშვნის შესახებ საკითხი.
უმრავლესობის მიერ მიღებული გადაწყვეტილებით ტერმინი გენდერი გაქრება ყველა საკანონმდებლო აქტებიდან.
სხდომაზე აგრეთვე იმსჯელეს ამა თუ იმ გადაწყვეტილებებში არასამთავრობო ორგანიზაციების სავალდებულო მონაწილეობის გაუქმებაზე.
უმრავლესობის წევრებმა ასევე, მიმდინარე პოლიტიკური საკითხები განიხილეს.
