წალენჯიხის მუნიციპალიტეტის სოფელ საჩინოში, სასოფლო-სამეურნეო სავარგულებზე ხანძარია. ადგილზე რამდენიმე სახანძრო-სამაშველო ბრიგადა მუშაობს.
მუნიციპალიტეტის მერის მოადგილის, ვანო ბურდულის განცხადებით, დღის განმავლობაში მუნიციპალიტეტის რამდენიმე სოფელში იყო ხანძრის კერები, რაც, მისი თქმით, საგაზაფხულო სამუშაოებს უკავშირდება.
„ხანძრის დაახლოებით 25 კერა იყო. მოსახლეობა ნარჩენებისგან წმენდს სასოფლო-სამეურნეო სავარგულებს, რაც ხშირად ხანძრის გამომწვევი მიზეზი ხდება. ხანძარმა დააზიანა ელექტროსადენები, სოფლის სასაფლაო“, – განაცხადა ვანო ბურდულმა.
საგანგებო სიტუაციების მართვის სამსახურის ინფორმაციით, წალენჯიხის მუნიციპალიტეტში ხანძრის 10-ზე მეტი კერა იყო, ამჟამად ცეცხლის ქრობის პროცესი სოფელ საჩინოში მიმდინარეობს. მათივე ცნობით, ხანძრის არცერთი კერა არ არის მოსახლეობასთან ახლოს და დასახლებულ ტერიტორიებს საფრთხე არ ემუქრება.