ევროკავშირის ლიდერებმა განაცხადეს, რომ გააგრძელებენ უკრაინის მხარდაჭერას, თუმცა მათ დაუყოვნებლივ არ დაუჭირეს მხარი უკრაინის პრეზიდენტის, ვოლოდიმირ ზელენსკის მოწოდებას, დაემტკიცებინათ არტილერიის შესყიდვისთვის, სულ მცირე, 5 მილიარდი ევროს პაკეტი. ინფორმაციას ამის შესახებ სააგენტო Reuters-ი ავრცელებს.
„ჩვენ გვჭირდება სახსრები საარტილერიო ჭურვებისთვის და ნამდვილად მადლობელნი ვიქნებით ევროპის მხარდაჭერისთვის, სულ მცირე, ხუთი მილიარდი ევროს ოდენობით, რაც შეიძლება მალე“, – განუცხადა ზელენსკიმ ბრიუსელში შეკრებილ ევროკავშირის ლიდერებს.
ევროკავშირის საგარეო პოლიტიკის ხელმძღვანელმა, კაია კალასმა ასევე მოუწოდა ლიდერებს, უკრაინის მხარდაჭერის სიტყვები საქმით გაემყარებინათ.
ყველა ლიდერის მიერ დამტკიცებულ განცხადებაში – ვიქტორ ორბანის გარდა – მათ პირობა დადეს, რომ გააგრძელებენ უკრაინის რეგულარულ და პროგნოზირებად ფინანსურ მხარდაჭერას. მათ ასევე განაცხადეს, რომ წევრმა სახელმწიფოებმა სასწრაფოდ უნდა გააძლიერონ ძალისხმევა უკრაინის გადაუდებელი სამხედრო და თავდაცვითი საჭიროებების დასაკმაყოფილებლად.
თუმცა, არ ყოფილა კონკრეტული პასუხი კალასის წინადადებაზე, ფოკუსირება მოეხდინათ იმაზე, რაც ზელენსკის გადაუდებლად სჭირდება, როგორიცაა 2 მილიონი საარტილერიო ჭურვი.