აშშ-ის სპეციალურმა წარმომადგენელმა უკრაინაში, გენერალმა კიტ კელოგმა ABC News-თან ინტერვიუში განაცხადა, რომ იგი ცდილობდა ვოლოდიმირ ზელენსკი დონალდ ტრამპთან შეხვედრისთვის მოემზადებინა, თუმცა, უკრაინის პრეზიდენტმა შეცდომა დაუშვა, როდესაც „მაყურებელთან თამაში“ დაიწყო.
კელოგის თქმით, ვოლოდიმირ ზელენსკის ის და სენატორებისგან შემდგარი ჯგუფი დონალდ ტრამპთან შეხვედრისთვის მომზადებაში ეხმარებოდნენ.
„იმ დილით სასტუმრო „Hay Adams”-ში მე 13 სენატორთან ერთად ვიყავი. ჩვენ ვუთხარით ზელენსკის: კარგი, ჩვენ გეტყვით თქვენ, როგორ ხდება ეს, როდესაც თქვენ ოვალურ კაბინეტში შედიხართ, რომ თქვენ არ იყოთ გაკვირვებული და გესმოდეთ, რომ დონალდ ტრამპი მნიშვნელოვნად განსხვავდება ჯო ბაიდენისგან“, – განაცხადა კელოგმა.
მან ასევე აღნიშნა, რომ თავიდან მოლაპარაკებები კარგად მიმდინარეობდა, თუმცა როდესაც ოთახში ჟურნალისტები შემოვიდნენ ზელენსკიმ „მაყურებელთან თამაში“ დაიწყო, რაც კელოგის აზრით, შეცდომა იყო.
„ვფიქრობ, რომ მან ტრამპთან არასწორი მიდგომა აირჩია“, – აღნიშნა კელოგმა და დაამატა, რომ ოვალურ კაბინეტში შემდგარი შეხვედრის შემდეგ ზელენსკი მიხვდა, რომ სხვა ტიპის პოლიტიკურ ლიდერთან ჰქონდა საქმე.
ცნობისთვის, უკრაინისა და აშშ-ის პრეზიდენტებს შორის შეხვედრა 28 თებერვალს თეთრ სახლში შედგა.