ჰამასის ოფიციალური პირების ინფორმაციით, 22 მარტს ისრაელის საჰაერო იერიშის შედეგად ქალაქ ხან-იუნისში ტერორისტული ორგანიზაციის პოლიტიკური ლიდერი, სალაჰ ალ-ბარდავილი დაიღუპა.
პროჰამასური მედიის მტკიცებით, საჰაერო დარტყმის შედეგად ბარდავილის მეუღლეც გარდაიცვალა, რომელიც მასთან ერთად კარავში ლოცულობდა.
ჰამასის მედია მრჩეველმა, ტაჰერ ალ-ნონომ, ბარდავილის სიკვდილის შესახებ სოციალურ ქსელში დაწერა
“მისი, მისი მეუღლისა და მოწამეების სისხლი დარჩება განთავისუფლებისა და დამოუკიდებლობისთვის ბრძოლის საწვავად. მტერი ვერ გატეხავს ჩვენ სიმტკიცესა და ნებას”. – განაცხადა ჰამასმა.
მანამდე, ისრაელმა ღაზის სექტორში სახმელეთო ოპერაციები განაახლა მას შემდეგ, რაც 18 მარტს მხარეებს შორის დადებული ცეცხლის შეწყვეტის შეთანხმება ჩამოიშალა.
საჰაერო იერიშების შემდეგ, ისრაელის თავდაცვის მინისტრი ისრაელ კაცი დაიმუქრა, რომ ღაზაში ჰამასის ტერორისტული ორგანიზაციის მმართველობის გაგრძელებას მისი “სრული განადგურება და ნგრევა” მოჰყვება.
ისრაელის თავდაცვის ძალების (IDF) ცნობით, სამხედროები სამხრეთ და ჩრდილოეთ ღაზის გამყოფი ნეცარიმის დერეფანზე კონტროლის აღდგენის პროცესში არიან, რომელიც ისრაელელმა სამხედროებმა ცეცხლის შეწყვეტის შეთანხმების პირველი ფაზის ფარგლებში დატოვეს.
ისრაელის არმიის თქმით, სამხედრო მოქმედებების მიზანი საზღვრის მიმდებარედ უსაფრთხოების ზონის გაფართოება და ჩრდილოეთ და სამხრეთ ღაზას შორის ნაწილობრივი ბუფერული ზონის შექმნაა.
ამასთანავე, ისრაელ კაცმა განაცხადა, რომ ისრაელი მალე გამოსცემს სექტორში საბრძოლო ზონებისთვის საევაკუაციო ბრძანებებს.
ცნობისთვის, 18 მარტის დილის საათებში ისრაელსა და ჰამასის ტერორისტულ ორგანიზაციას შორის არსებული დროებითი ზავი ჩამოიშალა მას შემდეგ, რაც ისრაელის თავდაცვის ძალებმა (IDF) ღაზის სექტორში ათეულობით საჰაერო იერიში მიიტანა.
