აშშ-ის სახელმწიფო მდივანმა, მარკო რუბიომ სახელმწიფო დეპარტამენტში ბალტიის ქვეყნების საგარეო საქმეთა მინისტრებთან შეხვედრა გამართა.
შეხვედრას ესწრებოდნენ ესტონეთის საგარეო მინისტრი მარგუს ცაჰკნა, ლატვიის საგარეო საქმეთა მინისტრი ბაიბა ბრაჟე და ლიეტუვის საგარეო საქმეთა მინისტრი კიასტუტის ბუდრი.
როგორც აღინიშნა, შეხვედრის მთავარი მიზანი იყო უკრაინისთვის მოკავშირეთა მხარდაჭერისა და ნატო-ს გაძლიერების საკითხების განხილვა.
ლატვიის საგარეო მინისტრმა, ბაიბა ბრაჟემ აღნიშნული შეხვედრა დადებითად შეაფასა.
„გაიმართა სრულყოფილი შეხვედრა ვაშინგტონში. ლატვია, ბალტიის ქვეყნები და აშშ სრულყოფილი მოკავშირეები არიან – და ჩვენ კიდევ უფრო ძლიერ პარტნიორობას შევქმნით უსაფრთხოებისა და ეკონომიკური კუთხით“, –წერს ბრაჟე სოციალურ ქსელში.
ესტონეთის საგარეო მინისტრმა, მარგუს ცაჰკნამ კი მადლობა გადაუხადა სახელმწიფო მდივან რუბიოს „დროული და ნაყოფიერი მოლაპარაკებებისთვის“. მისი თქმით, შეხვედრაზე იმსჯელეს ტრანსატლანტიკური ურთიერთობების გაძლიერებისა და უკრაინაში მდგრადი მშვიდობისკენ მიმართული ძალისხმევის შესახებ.