აშშ-ის ვიცე-პრეზიდენტი ჯეი დი ვენსი გრენლანდიაში გაემგზავრება. ამის შესახებ ვენსმა სოციალურ ქსელში გამოქვეყნებულ ვიდეომიმართვაში ისაუბრა.
„დიდი აღფრთოვანება გამოიწვია ჩემი მეუღლის, უშას გრენლანდიაში დაგეგმილმა ვიზიტმა, რის გამოც გადავწყვიტე, რომ არ მინდოდა, მას ეს სიამოვნება მარტო გამოეცადა. ასე რომ, მას მეც გავყვები“, – აღნიშნა ვენსმა.
აშშ-ის ვიცე-პრეზიდენტის განცხადებით, ვიზიტის მთავარი მიზანია გრენლანდიის უსაფრთხოების მდგომარეობის შეფასება.
„გადავამოწმებ, თუ რა ხდება იქ უსაფრთხოების კუთხით. როგორც იცით, ეს ძალიან მნიშვნელოვანია. ბევრი ქვეყანა დაემუქრა გრენლანდიას, დაემუქრა მისი ტერიტორიებისა და საზღვაო გზების გამოყენებით. ასე რომ, ჩვენ გვსურს, გადავამოწმოთ, თუ რა სიტუაციაა იქ“, – აღნიშნა ჯეი დი ვენსმა.
ვენსის თქმით, გრენლანდიის მიმართ ამერიკისა და დანიის ლიდერებმა დიდი ხნის განმავლობაში გულგრილობა გამოიჩინეს, რამაც ზიანი მიაყენა როგორც გრენლანდიას, ისე მსოფლიო უსაფრთხოებას.
აშშ-ის დელეგაცია გრენლანდიას 27-29 მარტს ეწვევა. დელეგაციის შემადგენლობაში არიან აშშ-ის ვიცე პრეზიდენტი ჯე დი ვენსი, მისი მეუღლე უშა ვენსი, ეროვნული უსაფრთხოების საკითხებში თეთრი სახლის მრჩეველი მაიკ უოლცი და ენერგეტიკის მინისტრი კრის რაიტი.