პარლამენტის გარემოს დაცვისა და ბუნებრივი რესურსების კომიტეტის თავმჯდომარის პირველი მოადგილე, ლადო ბოჟაძე, მამუკა ხაზარაძისა და ბადრი ჯაფარიძის დროებით საგამოძიებო კომისიაზე არ გამოცხადებას გამოეხმაურა და აღნიშნა, რომ მათ ურჩევნიათ სისხლის სამართლის კოდექსი დაარღვიონ, ვიდრე პასუხი გასცენ კითხვებს.
მისივე თქმით, კომისიასთან თანამშრომლობა არის სავალდებულო, შესაბამისად, მმართველი გუნდი ელოდება პროკურატურის რეაგირებას.
“ისინი მზად არიან სისხლის სამართლის დანაშაულიც კი ჩაიდინონ, ოღონდ არ მოვიდნენ კომისიაზე და იმ კითხვებს არ გასცენ პასუხი, რომელიც აქვთ კომისიის წევრებს და საზოგადოებას. იმდენად მძიმეა მათთვის, როგორც ჩანს, ამ კითხვებზე პასუხის გაცემა, ურჩევნიათ დაარღვიონ სისხლის სამართლის კოდექსი. გარდა იმისა, რომ მათთვის მძიმეა ამ კითხვებზე პასუხის გაცემა, ასევე, სურთ ე.წ. პოლიტიკური დევნილის მანტია მოირგონ.
ჩვენ ველოდებით პროკურატურის შემდგომ ნაბიჯებს იმ თვალსაზრისით, რომ ყველამ იცოდეს, კომისიასთან თანამშრომლობა არის სავალდებულო, ეს განსაზღვრულია საქართველოს კანონმდებლობით და, მათ შორის, საერთაშორისო პრაქტიკაა. შემიძლია გავიხსენო პოლონეთი, როდესაც ყოფილი იუსტიციის მინისტრი სწორედ იმიტომ მისცეს პასუხისგებაში, რომ მან უარი თქვა ასეთ კომისიასთან თანამშრომლობაზე”, – აღნიშნა ლადო ბოჟაძემ.
საქართველოს პარლამენტში “2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის” შემსწავლელი დროებითი საგამოძიებო კომისიის წევრებმა ბადრი ჯაფარიძის საკითხის პროკურატურისთვის გადაცემას კენჭი უყარეს.
საგამოძიებო კომისიის სხდომაზე არ გამოცხადების გამო, ხაზარაძის შემდეგ, “ლელოს” კიდევ ერთი დამფუძნებლის საქმე უწყებას დღის ბოლომდე გადაეცემა. მამუკა ხაზარაძის საქმეზე კი პროკურატურამ გამოძიება 349-ე მუხლით დაიწყო, რაც “დროებითი საგამოძიებო კომისიის მოთხოვნის არ შესრულებას” გულისხმობს და ჯარიმით ან ერთ წლამდე პატიმრობით ისჯება. “ლელოს” ლიდერები არ გამოცხადდნენ სხდომაზე, რომელზეც ბიზნესზე ზეწოლის ერთ-ერთი ეპიზოდი, შპს “მაგნატის” საქმე განიხილეს. ბიზნესმენმა ჯემალ ლეონიძემ ქონების ჩამორთმევის სქემაზე ისაუბრა და გვარები დაასახელა, მათ შორის “თიბისის” დამფუძნებლები, რომლებიც, მისი მტკიცებით, ბიზნესის წართმევის საქმეში ფიგურირებდნენ.