ნებისმიერ წარმატებულ ხელისუფლებას სჭირდება ჯანსაღი ოპოზიცია. ჩვენ არასდროს გვითქვამს, რომ ოპოზიცია არ გვჭირდება, – განაცხადა გადაცემა „დღის ქრონიკაში“ საპარლამენტო უმრავლესობის წევრმა, ზვიად შალამბერიძემ.
მისი თქმით, ოპოზიცია უნდა იყოს როგორც ცენტრალურ დონეზე, ასევე ადგილობრივ მმართველობაში, რათა პროცესი ჯანსაღად წარიმართოს.
„ჯანსაღ ოპოზიციას რას ვეძახით – ოპოზიციას, რომელმაც შეიძლება მიუთითოს ხელისუფლებას გარკვეული მიმართულებებით, რაც შეიძლება ხელისუფლებამ ვერ დაინახოს. არ შეიძლება იდეალურად მუშაობდეს არც ცენტრალური და არც ადგილობრივი ხელისუფლება. თუ ოპოზიცია უთითებს ან ჩართულია იმ კანონების შემუშავებაში, რომელ კანონებსაც სთავაზობს ამ შემთხვევაში ცენტრალური ხელისუფლება ან პარლამენტში უმრავლესობა, რა თქმა უნდა მივესალმებით და გვქონდა ამის პრეცედენტები“, – აღნიშნა ზვიად შალამბერიძემ.
მისივე თქმით, ჩვენ ვხედავთ ოპოზიციას, რომელიც თავისი ქვეყნისთვის ანტიკონსტიტუციურ ნაბიჯებს დგამს და ყველანაირად ცდილობს დააკნინოს თავისი ქვეყანა უცხოელი პარტნიორების თვალში.
„არაერთი მაგალითი ვნახეთ, როდესაც ოპონენტები დადიოდნენ კორიდორებში ევროკავშირის და ევროსაბჭოსი და მოითხოვდნენ დაესანქცირებინათ ქვეყანა, მოითხოვდნენ, რომ ვიზალიბერალიზაცია შეჩერებულიყო და ა.შ. ეს არის სწორედ ის ნაბიჯები, რომლებიც ითვლება, რომ არის არაკონსტიტუციური, მაგრამ, რა თქმა უნდა, ჩვენ არ განვსჯით ამას. ამას განსჯის საკონსტიტუციო სასამართლო და მიიღებს შესაბამის გადაწყვეტილებას“, – განაცხადა ზვიად შალამბერიძემ.
მისივე თქმით, რა თქმა უნდა, ის, რომ პოლიტიკური ველი ოპოზიციისთვის გასათავისუფლებელია, ეს ფაქტია.
„ვხედავთ ხავსმოკიდებულ ადამიანებს, ოპოზიციას ვგულისხმობ, რომელთა სახელები და გვარები 2003 წლიდან გვესმის, დღესაც იგივე პოლიტიკური ლიდერები მიუძღვიან იმ ადამიანებს, რომლებსაც თვლიან, რომ არიან ოპოზიცია. რა თქმა უნდა, შეიძლება მათ რიგებში მართლა არიან გულანთებული ახალგაზრდები, მაგრამ გარკვეულწილად ექცევიან ასეთი ადამიანების ჩრდილში, რომლებიც უკვე ვახსენე. ფაქტობრივად, იკავებენ იმ ადგილს, რომელი ადგილიც შეიძლება ჯანსაღმა ოპოზიციამ დაიჭიროს“, – აღნიშნა ზვიად შალამბერიძემ.