საქართველოს ეროვნული ბანკის პრეზიდენტი ნათია თურნავა საპენსიო სააგენტოს მმართველობითი საბჭოს ახალ წევრებს შეხვდა.
სებ-ის ინფორმაციით, შეხვედრაზე განიხილეს ეროვნული ბანკის საზედამხედველო მანდატის გაფართოება, რომელიც 2025 წლის პირველი მაისიდან ამოქმედდება. აღნიშნული ცვლილების ფარგლებში, ეროვნული ბანკი ზედამხედველობას გაუწევს არამხოლოდ საპენსიო სააგენტოს საინვესტიციო საქმიანობას, არამედ სააგენტოს ადმინისტრაციულ და სხვა საოპერაციო ფუნქციებსაც.
სებ-ის ცნობით, დისკუსიის ფარგლებში, ყურადღება დაეთმო მმართველობითი საბჭოს წევრების სამომავლო გეგმებსა და გარდამავალი პერიოდის განმავლობაში საპენსიო სააგენტოს ზედამხედველობის ეფექტიანობის უზრუნველყოფას.
„ჩვენი, როგორც ზედამხედველის, მთავარი მიზანია საპენსიო სააგენტოს მონაწილეთა დანაზოგების უსაფრთხოებისა და ეფექტიანი მართვისთვის საიმედო გარემოს უზრუნველყოფა იმ საზედამხედველო მექანიზმების გამოყენებით, რომლებიც კანონმდებლობამ მოგვანიჭა. დღევანდელი შეხვედრა გაცნობითი ხასიათის იყო და მის ფარგლებში მიმოვიხილეთ გარდამავალ პერიოდში ახლად შექმნილი ბორდის საქმიანობა და ზედამხედველობასთან დაკავშირებული სხვა მნიშვნელოვანი საკითხები“, – განაცხადა ეროვნული ბანკის პრეზიდენტმა ნათია თურნავამ.