აჭარის საპრომოციო მასალები განახლდა. აჭარის ტურიზმის დეპარტამენტმა რეგიონის ტურისტული პროდუქტის პოპულარიზაციის მიზნით სხვადასხვა თემატიკის, ახალი საპრომოციო ბროშურები მოამზადა. „გასტრონომია და ღვინო“, „ბუნება და ეკოტურიზმი“, „ისტორია, კულტურა და სპორტი“, „საქმიანი ტურიზმი“ იმ ბროშურებს შორისაა, რომლებსაც ვიზიტორები საერთაშორისო ტურისტულ გამოფენებსა თუ ტურისტულ საინფორმაციო ცენტრებში ეცნობიან. ინფორმაციას აჭარის ტურიზმისა და კურორტების დეპარტამენტი ავრცელებს.
განახლდა აჭარის რუკა და ბათუმი-აჭარის გზამკვლევიც. აჭარის ტურიზმის დეპარტამენტის ტურისტული პროდუქტების განვითარების სააგენტომ, რეგიონში არსებულ 26-ვე, მარკირებულ საფეხმავლო მარშრუტს თავი ერთ რუკაზე მოუყარა. განახლებული რუკით მთიან აჭარაში მოგზაურობის მსურველები ყველა საფეხმავლო მარშრუტზე დამოუკიდებლად შეძლებენ გადაადგილებასა და მოგზაურობას.
განახლებული რუკისა და ბროშურების აღება ტურისტებს რეგიონში არსებულ 9-ვე ტურისტულ-საინფორმაციო ცენტრში უფასოდ შეუძლიათ. იქვეა შესაძლებელი სააგენტოს მიერ ბოლო წლებში დაბეჭდილი წიგნების აღებაც. წიგნებს შორისაა „კულინარიული მოგზაურობა აჭარაში“, „თევზეული ქართულ სამზარეულოში“, „ხალხური ტრადიციები და რიტუალები აჭარაში“, „ხალხური თამაშობები და სათამაშოები აჭარაში“ და „ხალხური რეწვა აჭარაში“. აღნიშნული წიგნების ელექტრონული ვერსიების ნახვა მსურველებს სააგენტოს ვებ-გვერდზეც https://visitajara.com/ka შეუძლიათ. ვებ-გვერდზევეა განთავსებული რუკების GPS ფაილებიც. ტურისტულ-საინფორმაციო ცენტრები ბათუმში, აჭარის ყველა მუნიციპალიტეტში, აეროპორტსა და სარფის სასაზღვრო-გამშვებ პუნქტზეა განთავსებული.