ზაფხულის სანავიგაციო სეზონზე, საქართველოსა და კორეის რესპუბლიკას შორის სეზონური ჩარტერული ფრენები განახლდება. ავიაკომპანია Korean Air-ი პირდაპირ ფრენებს ინჩეონსა და თბილისს შორის მიმდინარე წლის 11 მაისს, 25 მაისს, 8 ივნისს, 22 ივნისსა და 6 ივლისს შეასრულებს. ეკონომიკისა და მდგრადი განვითარების მინისტრის მოადგილის მარიამ ქვრივიშვილის განცხადებით, სამხრეთ კორეასთან სეზონური ჩარტერული ფრენების განახლება ახალი საინტერესო მიმართულებაა ჩვენი ქვეყნისთვის.
„პირდაპირი ჩარტერული ფრენები ხელს შეუწყობს საქართველოში ტურისტული ნაკადების შემოსვლას და გაზრდის ინტერესს ჩვენი ქვეყნის მიმართ. პარალელურად, ჩვენ ვატარებთ მასშტაბურ მარკეტინგულ კამპანიებს და პროექტებს სამხრეთ კორეაში, რათა საქართველოს, როგორც ტურისტული მიმართულების ცნობადობა გაიზარდოს“, – განაცხადა მინისტრის მოადგილემ.
როგორც მარიამ ქვრივიშვილმა აღნიშნა, მიმდინარე წელს ტურისტული ნაკადების ზრდის დინამიკა ძალიან პოზიტიურია და დარგი მდგრადად და დივერსიფიცირებულად ძლიერდება. მისი თქმით, პოზიტიური ცვლილებებია პირდაპირი ფრენების და ახალი ავიაკომპანიების შემოსვლის კუთხითაც. „შეგვიძლია საფუძვლიანად ვივარაუდოთ, რომ მიმდინარე წელი ტურიზმისა და სამოქალაქო ავიაციის ინდუსტრიაში ძალიან წარმატებული იქნება“, – აღნიშნა მინისტრის მოადგილემ.
აღსანიშნავია, რომ კორეის რესპუბლიკის წამყვანმა ავიაკომპანიამ ინჩეონი – თბილისი – ინჩეონის საჰაერო ხაზზე ჩარტერული ავიარეისები გასულ წელსაც შეასრულა, 2018-2019 წლებში კი სეზონური ფრენები სეული – თბილისი – სეულის მიმართულებით განხორციელდა.
საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტომ Korean Air-ს საქართველოს მიმართულებით არარეგულარული საჰაერო მიმოსვლის განხორციელებისთვის აუცილებელი ნებართვა 2025 წლის 2 აპრილს მიანიჭა.