საქართველოს აეროპორტების გაერთიანების ინფორმაციით, საქართველოს ავიაბაზარზე ოპერირება Transavia France-მა დაიწყო. ავიაკომპანიამ პირველი რეისით თბილისში ბოინგ 737-800-ით პარიზის ორლის აეროპორტიდან 163 მგზავრი ჩამოიყვანა.
საქართველოს აეროპორტების გაერთიანების გენერალური დირექტორის, ლევან მოსეშვილის განცხადებით, საფრანგეთის დედაქალაქის სამ საერთაშორისო აეროპორტთან საქართველო ახლა ორი საერთაშორისო აეროპორტით არის დაკავშირებული.
„კიდევ ერთმა ევროპულმა ავიაკომპანიამ დაიწყო ოპერირება ჩვენს აეროპორტში. მოხარული ვართ, რომ ჩვენი თანამშრომლობა Air France-KLM ჯგუფთან წარმატებით დასრულდა და საქართველოს ავიაბაზარზე ფრანგულ-ჰოლანდიური მულტინაციონალური საავიაციო ჰოლდინგის კიდევ ერთი ავიაკომპანია შემოვიდა.
ჩვენ მუდმივად ვმუშაობთ ბაზრების დივერსიფიკაციაზე და ვცდილობთ, საშუალება მივცეთ ჩვენს მგზავრებს, სხვადასხვა აეროპორტიდან იმოგზაურონ. მნიშვნელოვანია, რომ Transavia France-ი თბილისში პარიზის ორლის აეროპორტიდან იფრენს, რაც ნიშნავს, რომ საფრანგეთის დედაქალაქი საქართველოს დედაქალაქთან უკვე ორი საერთაშორისო აეროპორტის საშუალებით იქნება დაკავშირებული, ხოლო პარიზის მესამე აეროპორტში (ბოვე) ფრენები ქუთაისის საერთაშორისო აეროპორტიდან ხორციელდება“, – განაცხადა ლევან მოსეშვილმა.
საქართველოს აეროპორტების გაერთიანების ინფორმაციით, Transavia France 2006 წელს დაფუძნებული ფრანგული დაბალბიუჯეტური ავიაკომპანიაა, რომელიც Air France-ისა და ჰოლანდიური Transavia-ს მფლობელობაში შედის. მისი ძირითადი ბაზა პარიზის, ორლის აეროპორტში მდებარეობს. ბილეთების შეძენა ავიაკომპანიის ვებგვერდზეა შესაძლებელი.