შალვა ხუციშვილი – როდესაც გაირკვევა საკითხი, შემდეგ მოხდება რეაგირება

“იური ლუჟკოვის პასპორტიდან გამომდინარე, მესაზღვრეს არ ჰქონდა ნიშანი იმისა, რომ დაედგინა, იყო თუ არა ოკუპირებული ტერიტორიების შესახებ კანონის დარღვევა”, – ამის შესახებ საქართველოს შს მინისტრის მოადგილემ, შალვა ხუციშვილმა მოსკოვის ყოფილი მერის, იური ლუჟკოვის საქართველოში სტუმრობის საკითხზე საუბრისას განაცხადა.
როგორც ხუციშვილმა აღნიშნა, იური ლუჟკოვი საქართველოს საზღვარზე შემოვიდა ლეგალური საბუთებით, რის გამოც მესაზღვრეებს არ ჰქონდათ საფუძველი სხვა სახის გადაწყვეტილების მიღების.
რაც შეეხება საკითხს, თუ დადგინდა რაიმე ტიპის კანონდარღვევა, დაჯარიმდება თუ არა მოსკოვის ყოფილი მერი, შალვა ხუციშვილი პასუხობს, რომ “როდესაც გაირკვევა საკითხი, შემდეგ მოხდება რეაგირება”.
მოსკოვის ყოფილი მერი იური ლუჟკოვი საქართველოს მეუღლესთან ერთად სტუმრობს. როგორც ცნობილია, 80 წლის ლუჟკოვმა, მისმა მეუღლემ და მათმა თანმხლებმა პირებმა სოფელ ქანდაში 13 ასურელი მამის მონასტერი მოინახულეს. იური ლუჟკოვი 2006 და 2009 წელს არის ოკუპირებულ სოხუმში ნამყოფი და მას დარღვეული აქვს ”ოკუპაციის შესახებ საქართველოს კანონი”.