2012 წლის შემდეგ ზუსტად ვიცით, საით მივექანებით. გეტყვით, საით მივექანებით – ეს არის ადამიანის უფლებების უკეთესი დაცვა, – ამის შესახებ პარლამენტის თავმჯდომარე ირაკლი კობახიძემ ბათუმში, საკონსტიტუციო ცვლილებების საყოველთაო-სახალხო განხილვისას განაცხადა, რითაც ერთ-ერთი მოქალაქის კითხვას უპასუხა იმის თაობაზე, თუ ”საით მიექანება ქვეყანა”.
„ზუსტად ვიცით საით მივექანებით, ეს არის ადამიანის უფლებების დაცვა. გავექანეთ ჩვენ 2012 წელს იქითკენ, რომ 24 500 პატიმრის ნაცვლად, დღეს გვყავს 9 500 პატიმარი. აი, აქეთ გავექანეთ ბატონებო. ციხეებში კვდებოდა 150 კაცი, ახლა 12 კაცი კვდება. 12-ჯერ ნაკლები ადამიანი კვდება დღეს ციხეებში და აქეთკენ გავექანეთ ჩვენ 2012 წელს. ქუჩაში ხალხს აღარ ხოცავენ, მომიტინგეებს აღარ არბევენ სასტიკი ფორმით – აქეთ გავექანეთ ჩვენ 2012 წელს. ეს არის ყველაფერი, საითაც ყველა ერთად მივექანებით და მადლობა ღმერთს, რომ აქეთ მივექანებით. მეტი დემოკრატიაა. გახსოვთ რა ხდებოდა, როგორი იყო მაგალითად პარლამენტი -ნოტარიუსი, თითის დაჭერა – მეტი არაფერი არ ხდებოდა ამ ორგანოში. ყველა ერთად გავექანეთ უკეთესი დემოკრატიისკენ და ეს ყველამ ერთად გავაკეთეთ, აქ მჯდომმა თითოეულმა ადამიანმა. ეკონომიკას რაც შეეხება, მთელი რეგიონის მასშტაბით საქართველოს აქვს ერთ-ერთი ყველაზე მაღალი მაჩვენებელი ეკონომიკური ზრდის და აქეთ მივექანებით“, – განაცხადა ირაკლი კობახიძემ.
პარლამენტის თავმჯდომარემ სოციალურ დაცვაზეც გაამახვილა ყურადღება. მისი თქმით, 2012 წელს ჯანდაცვის სამინისტროს ბიუჯეტი მილიარდ 600 მლნ იყო , დღეს კი 3 მილიარდ 200 მლნ -ზე მეტია. ორჯერ მეტი ფული იხარჯება იმაზე, რომ ჯანდაცვა იყოს უზრუნველყოფილი.