აჭარის მთავრობის თავმჯდომარემ, სულხან თამაზაშვილმა ქობულეთის მუნიციპალიტეტში, სოფელ ოჩხამურში თანამედროვე წყლის რეზერვუარის მშენებლობა დაათვალიერა და ადგილზე გაეცნო მიმდინარე სამუშაოებს.
აჭარის მთავრობის პრესამსახურის ინფორმაციით, ინფრასტრუქტურული განახლება მოიცავს, როგორც რეზერვუარების, ასევე, გამანაწილებელი ქსელებისა და ჭაბურღილების მოწყობას. სამუშაოების დასრულების შემდეგ, ქობულეთში წყლისა და წყალარინების სისტემით 1 571 აბონენტი ისარგებლებს.
ინფრასტრუქტურული სამუშაოები პარალელურად მიმდინარეობს შუახევში, ქედასა და ხელვაჩაურში. პროექტი ითვალისწინებს აჭარის 39 სოფლისა და დაბისთვის უწყვეტ წყალმომარაგებას, რაც 30 000-ზე მეტ მოსახლეს მოიცავს.
ქობულეთის მუნიციპალიტეტში აჭარის მთავრობის თავმჯდომარესთან ერთად აჭარის ფინანსთა და ეკონომიკის მინისტრი ჯაბა ფუტკარაძე, ქობულეთის მუნიციპალიტეტის მერის მოვალეობის შემსრულებელი ირაკლი ცეცხლაძე, აჭარის უმაღლესი საბჭოს და ქობულეთის საკრებულოს წარმომადგენლები იმყოფებოდნენ.