საქართველოს დამოუკიდებლობის დღე რუსთავში, თავისუფლების მოედანზე, მასშტაბურად აღინიშნება.
რუსთავის მერიის ინფორმაციით, დამოუკიდებლობის დღისადმი მიძღვნილი ღონისძიებები, საქართველოს ინფრასტრუქტურის სამინისტროსა და რუსთავის მერიის ორგანიზებით ტარდება.
სადღესასწაულო ღონისძიებებს, რუსთავის მერი ნინო ლაცაბიძე, საქართველოს ინფრასტრუქტურის მინისტრი რევაზ სოხაძე, ქვემო ქართლში სახელმწიფო რწმუნებული ლევან ხარაბაძე, საქართველოს პარლამენტში რუსთავისა და გარდაბნის ისტორიული სოფლების დელეგატი ირაკლი შატაკიშვილი, რუსთავის საკრებულოს ფრაქცია ,,ქართული ოცნების” წევრები, ინფრასტრუქტურის სამინისტროსა და რუსთავის მერიის წარმომადგენლები ესწრებოდნენ.
„რუსთავიდან ვულოცავ ყველას ჩვენი ქვეყნისთვის ერთ-ერთ ყველაზე მნიშვნელოვან დღეს – 26 მაისს. რუსთავში ისევე როგორც მთელს ქვეყანაში, საზეიმო განწყობაა. განსაკუთრებული მადლობა მინდა გადავუხადო ინფრასტრუქტურის სამინისტროს იმისთვის, რომ დღეს რუსთავში გვაქვს შესაძლებლობა ყველამ ერთად ვიზეიმოთ 26 მაისი. მთავარ მოედანზე უამრავი ადამიანია შეკრებილი, რუსთაველები ოჯახებით, შვილებთან და შვილიშვილებთან ერთად არიან მოსული. 26 მაისი ყველას გვაერთიანებს და გვაძლევს ძალიან დიდ იმედს, რომ ჩვენი ქვეყანა კიდევ უფრო გაძლიერდება”, – განაცხადა რუსთავის მერმა ნინო ლაცაბიძემ.
ქალაქის მთავარ მოედანზე დილიდან თავდაცვის სამინისტროს სამხედრო ტექნიკაა გამოფენილი, პარალელურად მიმდინარეობს საბავშვო-გასართობი, შემეცნებითი და სპორტული აქტივობები, ადგილობრივი მეწარმეების პროდუქციის გამოფენა-გაყიდვა, ყვავილების ფესტივალი, თითების თეატრის წარმოდგენა და ზღაპრული შოუ პატარებისთვის.
26 მაისის სცენაზე ქართული ქორეოგრაფიული ანსამბლების მონაწილეობით კონცერტი ჩატარდა. თავისუფლების მოედანზე სპეციალურად საქართველოს დამოუკიდებლობის დღისადმი მიძღვნილი ქორეოგრაფიული შოუ გაიმართება. რუსთავში, ისევე როგორც მთელ საქართველოში, დამოუკიდებლობის აქტზე ხელის მოწერის ზუსტ დროს, გურამ ყურაშვილის სახელობის აფხაზეთის სახელმწიფო საგუნდო კაპელა, ზვიად ბოლქვაძის ხელმძღვანელობით, საქართველოს ჰიმნს შეასრულებს.
საქართველოს დამოუკიდებლობის დღისადმი მიძღვნილი კონცერტი, რუსთავში 18:00 საათზე დაიწყება. საზეიმო ღონისძიებები ჯგუფ ,,ურსას“ გალა კონცერტით დასრულდება.