საერთაშორისო რეისები თუ განხორციელდება ვაზიანში, თელავის აეროპორტს შიდა ფრენებისთვის მოვიაზრებთ, – ამის შესახებ პირველმა ვიცე-პრემიერმა, ეკონომიკისა და მდგრადი განვითარების მინისტრმა, ლევან დავითაშვილმა განაცხადა.
მისი თქმით, ოპტიმალური იქნება, რომ თელავის აეროპორტი დაბალი დანახარჯებით განხორციელდეს.
„თელავის აეროპორტის ოპტიმიზაცია ბუნებრივია. ძალიან სწრაფად ხდება საქართველოში შიდა გზების და შიდა ინფრასტრუქტურის განვითარება, ბევრი ადგილი უკვე ერთმანეთთან არის ურთიერთდაკავშირებული, ამიტომ თელავის აეროპორტს ჩვენ მოვიაზრებთ მთლიანად შიდა ფრენებისთვის განკუთვნილ აეროპორტად. საერთაშორისო რეისები თუ იქნება ვაზიანში, ოპტიმალური იქნება, რომ თელავის აეროპორტი უფრო დაბალი დანახარჯებით განხორციელდეს და იყოს მხოლოდ შიდა რეისებისთვის გათვალისწინებული, ვაზიანი კი მოემსახურება ყველა ტიპის ჩარტერს, საერთაშორისო რეისს, – განაცხადა ლევან დავითაშვილმა.
მისი თქმით, ამჟამად პროექტის ოპტიმიზაცია მიმდინარეობს.
„ჩვენ ვფიქრობთ, რომ საკმაოდ ძვირადღირებული პროექტი იყო და მისი ოპტიმიზაცია ხდება. გეგმის ნაწილია, მოხდეს ის გაუმჯობესება, რაც გათვალისწინებულია თელავის აეროპორტის შიდა საავიაციო ქსელში ჩართვისთვის“, – განაცხადა ლევან დავითაშვილმა.