ირაკლი კობახიძე განმარტავს, რომ ქართული მიწების საკითხთან დაკავშირებით შესაბამისი ცვლილებები კანონმდებლობაში შევა.
ქართული მიწების საკითხთან დაკავშირებით, ირაკლი კობახიძემ ფილარმონიაში, კონსტიტუციური ცვლილებების საყოველთაო-სახალხო განხილვის კომისიის სხდომაზე მას შემდეგ ისაუბრა, რაც ფილარმონიაში მყოფმა სანდრო ბრეგაძემ, ლადო სადღობელაშვილმა და კიდევ რამდენიმე ახალგაზრდამ მოითხოვეს, საქართველოს კონსტიტუციაში ჩაიწეროს, რომ ქართული მიწები არ გასხვისდება.
ერთ-ერთი მოქალაქე დაინტერესდა, “ხელისუფლება რით განსხვავდება იმ ოკუპანტისგან, რომელიც კონსტიტუციაში არ წერს, რომ ქართული მიწა არ უნდა გაიყიდოს”.
თავის მხრივ, მმართველი გუნდის წევრებმა მზადყოფნა გამოთქვეს, რომ მიწებთან დაკავშირებით შეხვედრა გაიმართოს და საზოგადოებას აუხსნან, რა ჩაიწერება კონსტიტუციაში და რა ორგანულ კანონში.
საკითხზე განმარტებები პარლამენტის თავმჯდომარემ, ირაკლი კობახიძემაც გაააკეთა და ტყუილი უწოდა ოპონენტების იმ განცხადებას, რომ ქართული მიწების გასხვისება იგეგმება.
„ეს არის ტყუუილი. ყველაფერი კეთდება, რომ ეს საკითხი ისე მოწესრიგდეს, როგორც ჩვენი ეროვნული ინტერესია. საუბარია იმაზე, რომ შესაბამისი ცვლილებები კანონმდებლობაში შედის. მიწასთან დაკავშირებით აღმოჩნდა, რომ ინფორმაცია არ გაქვთ“, – მიმართა კობახიძემ საზოგადოებას.
თბილისის დიდ საკონცერტო დარბაზში კონსტიტუციის საერთო-სახალხო განხილვა არ შედგა. დარბაზში შეკრებილი ახალგაზრდების ჯგუფის შეძახილების გამო, სხდომის დაწყება ვერ მოხერხდა.