ინფრასტრუქტურის მინისტრი რევაზ სოხაძე ინფრასტრუქტურული პროექტების მიმდინარეობას და გამოწვევებს გურიაში ეცნობა.
სამინისტროს ინფორმაციით, მინისტრი, გურიის მხარეში სახელმწიფო რწმუნებულ გიორგი ღურჯუმელიძესთან და ადგილობრივი თვითმმართველობის წარმომადგენლებთან ერთად საჯავახო-ჩოხატაური-ოზურგეთი-ქობულეთის საავტომობილო გზის 7.2 კმ-იანი მონაკვეთის სარეაბილიტაციო სამუშაოებს ადგილზე გაეცნო.
რეაბილიტაცია უტარდება გზის სავალ ნაწილს, განახლდება ასფალტის საფარი, მოეწყობა რკინა-ბეტონის კიუვეტები, წყალგამტარი მილები, გაბიონის საყრდენი კედლები, ტროტუარები, მიერთებები, ადგილობრივი და მოსახლეობის ეზოებში შესასვლელები, ავტობუსის გასაჩერებელი მოედანი და საგზაო ნიშნები.
პროექტი სახელმწიფო ბიუჯეტიდან 7,9 მილიონი ლარით ფინანსდება. სამუშაოების დასრულება მიმდინარე წლის აგვისტოში იგეგმება.