“მმართველს უნდა ჰქონდეს ყველა ბერკეტი საიმისოდ, რომ პროცესი თავიდან ბოლომდე მართოს და შედეგები დადოს”

გარემოს დაცვის მინისტრმა, გიგლა აგულაშვილმა „ტვ პირველის“ ეთერში კომპანია „ჯორჯიან მანგანეზის“ შესახებ ისაუბრა და განაცხადა, რომ მიუხედავად არსებული დარღვევებისა, კომპანიას ლიცენზია არ ჩამოართვეს და აქციონერთა ინტერესები არ შეულახავთ.
მისივე თქმით, „ჯორჯიან მანგანეზის“ მენეჯმენტთან მის უწყებას დიდი ხნის განმავლობაში ჰქონდა კომუნიკაცია.
„ჩვენ დიდი ხნის განმავლობაში გვქონდა კომუნიკაცია კომპანიის მენეჯმენტთან. სამწუხაროდ, მიუხედავად იმისა, რომ ჩვენ ყველა რესურსი ამოვწურეთ კომუნიკაციის, შეგვეძლო გზაჯვარედინზე აგვერჩია ერთი გზა და ჩამოგვერთმია ლიცენზია. ჩვენ არ წავედით ამ გზით ზუსტად ეკონომიკური, სოციალური და სხვა ფაქტორების გათვალისწინებით. ჩვენ არ შევლახეთ აქციონერთა ინტერესები, საკუთრების უფლებას არ შევეხეთ, არ ჩამოვართვით ლიცენზია, არ გავაჩერეთ საწარმო, არ გავაუქმეთ სამუშაო ადგილები“, – განაცხადა გარემოს დაცვის მინისტრმა.
როგორც უწყების ხელმძღვანელმა აღნიშნა, მათ მიერ დანიშნულ სპეციალურ მმართველს უნდა ჰქონდეს ყველა ბერკეტი საიმისოდ, რომ პროცესი თავიდან ბოლომდე იმართოს და შედეგები დადოს.
„ახლა ველოდებით მმართველისგან კონკრეტულ, გაწერილ სამოქმედო გეგმას და კანონიდან გამომდინარე, შესაბამისი პროცედურების შესაბამისად, თვეში ერთხელ, სპეციალური მმართველი სამინისტროში წარმოადგენს ანგარიშს. დღემდე სამინისტროს ჰქონდა შესაძლებლობა, იქ თუ რაიმე ცუდი მოხდებოდა, მათ შორის გარემოს დაცვითი კუთხით, ეთქვა, რომ „ჯორჯიან მანგანეზი“ ტყუის, გამოგვეყენებინა ბერკეტები რაც ჩვენ გვაქვს, ჯარიმის თუ სხვა სახის და გვეთქვა, აი ის არის დამნაშავე. დღეს ამ ტიპის გადაწყვეტილებით, ჩვენ ავიღეთ მთლიანად პასუხისმგებლობა პროცესზე, როგორ იმოქმედებს სასამართლოს მიერ დანიშნული მმართველი. მისი ფუნქციები და ასე ვთქვათ, მისი საქმიანობა არ არის მხოლოდ ჩვენს ნება-სურვილზე დამოკიდებული. მმართველს უნდა ჰქონდეს ყველა ბერკეტი საიმისოდ, რომ პროცესი თავიდან ბოლომდე მართოს და შედეგები დადოს“,- განაცხადა გიგლა აგულაშვილმა.