“თუ თორდიაა დასასჯელი, თორდია უნდა დაისაჯოს, თუ ფარცხალაძეა დასასჯელი, ფარცხალაძე, თუ ორივეა, ორივე უნდა დაისაჯოს”,- ასე შეაფასა განათლებისა და მეცნიერების მინისტრმა, ალექსანდრე ჯეჯელავამ სახელმწიფო აუდიტის უფროსსა და ყოფილ მთავარ პროკურორს შორის მომხდარი ინციდენტი.
მისი განმარტებით, რაც არ უნდა ყოფილიყო დაპირისპირების მიზეზი, კანონის დარღვევა დაუშვებელია.
“საქმე ის არის, რომ რის გამოც არ უნდა დაიწყოს რამე, ხალხის ცემა არაფრით არ შეიძლება. მიუხედავად იმისა, რასთან არის დაკავშირებული. კანონის დარღვევა არ შეიძლება. ეს იგივეა, რომ ადამიანი აღელვებულია და ამის გამო დაარღვია მოძრაობის წესები. ეს არის მთავარი პრინციპი. მით უმეტეს, მაღალი თანამდებობის პირს აქვს თმენის ვალდებულება. მე ძალიან ხშირად გახსნილ კრიტიკას ვისმენ, მაგრამ ვალდებული ვარ, რომ ამაზე ვრეაგირებდე ცივილიზებულად. მიუხედავად იმისა, რა მიზეზებით მოხდა ესა თუ ის ქმედება კანონის დარღვევა დაუშვებელია, “,- განაცხადა ჯეჯელავამ.