საქართველოს ტერიტორიული მთლიანობის მხარდაჭერით, გარკვეულწილად ჩვენს ქვეყნებს ვიცავთ, – განაცხადა ნატო-ს საპარლამენტო ასამბლეის პრეზიდენტმა პაოლო ალიმ.
ნატო-ს საპარლამენტო ასამბლეის პრეზიდენტმა საქართველოს მიერ უსაფრთხოების საკითხებში შეტანილ წვლილზე ისაუბრა.
„გუშინ იყო ბრიუსელში ძალიან მნიშვნელოვანი შეხვედრა. შეხვედრაზე ხაზი გაესვა ჩვენს ურთიერთობებს, მის მნიშვნელობას. ნატო-ს საპარლამენტო ასამბლეა ახლა აქ იმყოფება, რათა კიდევ ერთხელ ხაზი გაუსვას საქართველოსადმი სრულ მხარდაჭერას, სრულ პასუხისმგებლობას და ვალდებულებას. ჩვენ ვიცით, რომ საქართველომ დიდი მუშაობა გასწია, უსაფრთხოების, უშიშროების კუთხით, განსაკუთრებით ავღანეთში, საერთაშორისო მისიების კუთხით. ეს არის მართლაც განსაკუთრებული წვლილი საქართველოს ჯარისკაცების მხრიდან შეტანილი და ჩვენ კიდევ უფრო მეტად და მეტად გვესმის, რომ სტაბილურობა, უსაფრთხოება, უშიშროება საქართველოში მართლაც ძალიან მნიშვნელოვანია საერთოდ მთელი რეგიონის სტაბილურობისათვის, რეგიონის სტაბილურობას კი ძალიან დიდი მნიშვნელობა აქვს ყველა დასავლური ქვეყნისათვის. ასე რომ, შეიძლება ითქვას, საქართველოს დაცვით, ტერიტორიული მთლიანობის მხარდაჭერით, ფაქტობრივად ჩვენს ქვეყნებს ვიცავთ. ასე რომ, სწორედ ეს არის ჩვენი აქ ჩამოსვლის მიზეზი.
„ეს არის კიდევ ერთი გზა და კიდევ ერთი საშუალება იმის გამოსახატად, თუ როგორ პასუხისმგებლობას ვგრძნობთ საქართველოს რეფორმების მხარდაჭერის გზაზე. მე ვიცი რომ თქვენ შიდა საკითხებზე გაქვთ საუბარი, მაგალითად საკონტიტუციო რეფორმაზე, რომელიც ძალიან მნიშვნელოვანია თქვენი ქვეყნისათვის. იცვლება სამყარო, იცვლება ბევრი რამ. ახალი ჰორიზონტები იხსნება, რომელიც მოიცავს ირანს, ჩინეთსა და სხვა. საქართველოს პოზიცია ამ გეოპოლიტიკურ გარემოში უფრო და უფრო მაღლდება, უფრო და უფრო მნიშვნელოვანი ხდება. მინდა ვთქვა, რომ ჩვენ სრულად მხარს ვუჭერთ თქვენს ევროატლანტიკურ მისწრაფებას და ჩვენი აქ ყოფნა მხარდაჭერის კიდევ ერთ დემონსტრაციაა“, – განაცხადა პაოლო ალიმ.