სპორტის მინისტრის მოადგილე ირაკლი დოლაბერიძემ ქალაქ ზუგდიდში მდებარე თანამედროვე სტანდარტების შესაბამისი სპორტული კომპლექსი დაათვალიერა და მიმდინარე ტექნიკურ სამუშაოებს გაეცნო.
სპორტკომპლექსში ამ ეტაპზე სპორტის სამინისტროს ექსპერტების ჯგუფის მიერ ტექნიკური პარამეტრების შემუშავება, შესაბამისი კვალიფიკაციის მქონე გუნდის დაკომპლექტება და ადმინისტრაციული საკითხების მოგვარება მიმდინარეობს.
ამასთანავე, დაწყებულია სპორტული კომპლექსის ქალაქ ზუგდიდის მერიისგან საქართველოს სპორტის სამინისტროსთვის გადმოცემის პროცედურები.
უახლოეს დღეებში სპორტული კომპლექსი ათდღიანი სატესტო რეჟიმით დაიწყებს ფუნქციონირებას. ამ პერიოდის განმავლობაში დაინტერესებულ პირებს შესაძლებლობა ექნებათ უფასოდ ისარგებლონ სპორტკომპლექსში არსებული აქტივობებით.
მინისტრის მოადგილესთან, ირაკლი დოლაბერიძესთან, ერთად სამეგრელო-ზემო სვანეთის სახელმწიფო რწმუნებული დავით ვერავა, ზუგდიდის მერის მოვალეობის შემსრულებელი ბესიკ ჭეჟია, შპს „სპორტმშენსერვისისა” და ადგილობრივი ხელისუფლების სხვა წარმონადგენლები იმყოფებოდნენ.
სპორტკომპლექსში განთავსებულია დიდი (33×25მ) და პატარა (16×8მ) ზომის საცურაო აუზები, სავარჯიშო და ძალოსნობის დარბაზები. სპორტული კომპლექსი აღჭურვილია ცურვის, წყალბურთის და ძალოსნობის შეჯიბრების ჩასატარებლად აუცილებელი ინვენტარით.
ინფორმაციას სპორტის სამინისტრო ავრცელებს.