ბიძინა ივანიშვილის საქველმოქმედო საქმიანობა თავისი შინაარსით გამორჩეულია ჩვენი ქვეყნისთვის, “პარაგრაფ თაბორი” ორიენტირებულია იმაზე, რომ ახალი ბიძგი მისცეს შესაბამისი ქალაქის, რეგიონის და მთლიანად ჩვენი ქვეყნის განვითარებას, – ამის შესახებ საქართველოს პრემიერ-მინისტრმა ირაკლი კობახიძემ სასტუმრო „პარაგრაფ თაბორის“ გახსნის ღონისძიებაზე სიტყვით გამოსვლისას განაცხადა.
მთავრობის მეთაურის შეფასებით „პარაგრაფ თაბორი“ თავისი მასშტაბით, ამბიციითა და შინაარსით, ახალ, ძალიან მნიშვნელოვან თავს წერს დედაქალაქის თანამედროვე ისტორიაში.
„მადლობა მინდა გადავუხადო ამ პროექტის ინიციატორს, ბატონ ბიძინა ივანიშვილს, რომელიც არის ამ იდეის სულისჩამდგმელი. ეს პროექტიც არის მისი საქველმოქმედო საქმიანობის მორიგი გამოვლინება და გამოხატულება. ყველა ანალოგიური პროექტი გამოირჩევა იმით, რომ ის არის ორიენტირებული, არა ფინანსური მოგების მიღებაზე, არამედ იმაზე, რომ ახალი ბიძგი მისცეს შესაბამისი ქალაქის, რეგიონის და მთლიანად ჩვენი ქვეყნის განვითარებას. სწორედ ამით გამოირჩევა „პარაგრაფ თაბორის“ პროექტიც. ეს კომპლექსი, რომელიც მსოფლიო დონის ბრენდის – „მარიოტის“ „ავტოგრაფ ქოლექშენის“ ნაწილია, თბილისს ამკვიდრებს ევროპული დონის, პრემიუმ კლასის ტურისტულ და საქმიან ცენტრად.
„პარაგრაფ თაბორი“ თანამედროვე არქიტექტურისა და ურბანული დაგეგმარების საინტერესო სინთეზს წარმოადგენს. თბილისში პირველი, უმაღლესი დონის გოლფის კლუბი, გამორჩეული სპა-კომპლექსი და ინოვაციური საბაგირო გზა, რომელიც მას ქალაქის გულთან, თავისუფლების მოედანთან აკავშირებს, მას რეგიონისთვის უნიკალურ პროექტად აქცევს“, – აღნიშნა პრემიერმა.
ირაკლი კობახიძის შეფასებით, სასტუმროში, გოლფის მოედანსა და საბაგიროში ჯამურად განხორციელებული 500 მილიონ ლარზე მეტი ინვესტიცია არის პირდაპირი, გრძელვადიანი დაბანდება დედაქალაქის და, ზოგადად, საქართველოს ეკონომიკურ მომავალში.
„ეს ინვესტიცია, უპირველეს ყოვლისა, ნიშნავს ასობით ახალ, მაღალანაზღაურებად სამუშაო ადგილს ჩვენი თანამოქალაქეებისთვის.
აღსანიშნავია, რომ „პარაგრაფ თაბორი“ არ არის ერთეული პროექტი. ის არის „საქართველოს ტურიზმის განვითარების ფონდის“ მიერ შექმნილი სასტუმროების ქსელის ნაწილი, რომელიც უკვე ფუნქციონირებს თბილისში, სიღნაღში და მალე აბასთუმანსაც მოიცავს. კიდევ ერთხელ მინდა მადლობა გადავუხადო ბატონ ბიძინა ივანიშვილს და ყველა იმ ადამიანს, რომელიც ჩართული იყო მისი ამ ინიციატივის განხორციელებაში. მადლობა მინდა გადავუხადო ტურიზმის განვითარების ფონდს, თითოეულ არქიტექტორს, ინჟინერსა და მშენებელს, ვინც ამ ამბიციური იდეის ხორცშესხმაში იყო ჩართული და ვინც ამ პროექტის განხორციელებაში წვლილი შეიტანა.
„პარაგრაფ თაბორი“ ჩვენს დედაქალაქს ახალ ხიბლსა და ენერგიას შესძენს და ქალაქის თანამედროვე განვითარების მისაბაძ მაგალითს შექმნის“, – განაცხადა ირაკლი კობახიძემ.
სასტუმრო „პარაგრაფ თაბორი“ საქართველოს პრემიერ-მინისტრმა პარლამენტის თავმჯდომარე შალვა პაპუაშვილთან, თბილისის მერ კახა კალაძესთან, ეკონომიკისა და მდგრადი განვითარების მინისტრ მარიამ ქვრივიშვილთან, ტურიზმის განვითარების ფონდის აღმასრულებელ დირექტორ გიორგი ბაიდარაშვილთან, თანაინვესტირების ფონდის გენერალურ დირექტორ დავით გალუაშვილთან და სასტუმროების მართვის კომპანიის აღმასრულებელ დირექტორ გიორგი ტოგონიძესთან ერთად გახსნა.
ღონისძიებას „მარიოტის“ რეგიონული დირექტორი შენერ სოიულე, „მარიოტისა“ და ბიზნესის წარმომადგენლები დაესწრნენ.
მთავრობის მეთაურმა და ღონისძიებაზე მიწვეულმა სტუმრებმა ახლად გახსნილი სასტუმრო დაათვალიერეს.
