ზელენსკის ვიზიტი აშშ-ში ისე არ წარიმართა, როგორც უკრაინის პრეზიდენტი იმედოვნებდა, – ამის შესახებ გერმანიის კანცლერმა, ფრიდრიხ მერცმა განაცხადა.
გერმანიის კანცლერმა აღნიშნა, რომ უკრაინის პრეზიდენტის ვიზიტმა აჩვენა, თუ რამდენად აუცილებელია უკრაინისთვის ევროპული დახმარება.
მერცის თქმით, ზელენსკისა და ტრამპის მოლაპარაკებების შემდეგ უკრაინის პრეზიდენტთან ხანგრძლივი სატელეფონო საუბარი ჰქონდა.
„ვიზიტი ისე არ წარიმართა, როგორც ზელენსკი იმედოვნებდა. ვფიქრობ, ამის თქმა შემიძლია“, – აღნიშნა მერცმა.
გერმანიის კანცლერის თქმით, ეს ევროპულ დახმარებას კიდევ უფრო მნიშვნელოვანს ხდის, რადგან ომის დასრულება მხოლოდ უკრაინის სამხედრო ძლიერებით შეიძლება.
მერცმა აღნიშნა, რომ იმუშავებს უკრაინის „ფინანსურად, პოლიტიკურად და, რა თქმა უნდა, სამხედრო კუთხით მხარდასაჭერად“.
ამასთან, გერმანიის კანცლერმა განაცხადა, რომ უკრაინისთვის კაპიტულაცია ვარიანტი არ არის, რადგან შემდეგ რუსეთი თავს დაესხმება რომელიმე ევროპულ ქვეყანას.