ტყეში გატაცებული ადამიანი მოკლეს და ყველა ერთხმად მხარს უჭერდა და ტაშს უკრავდა ამ ამბავს, – ამის შესახებ პარლამენტის ვიცე-სპიკერმა გია ვოლსკიმ განაცხადა, რომელიც აზერბაიჯანელი ჟურნალისტის, აფგან მუხთარლის გატაცების ფაქტს გამოეხმაურა.
“ყველაზე ხმამაღლა ლაპარაკობენ ის ადამიანები, რომლებიც პირდაპირ თუ ირიბად, მონაწილეობდნენ ადამიანების გატაცებაში. ტყეში გატაცებული ადამიანი მოკლეს და ყველა ერთხმად მხარს უჭერდა და ტაშს უკრავდა ამ ამბავს. დაბარება და იქ მუშტების ბრახუნი და რაღაც ცირკების მოწყობა, რაც ახასიათებთ, კატეგორიულად არ მიმაჩნია მომგებიანად ჩვენი ქვეყნისათვის და არა რომელიმე პარტიული ჯგუფისათვის”, – განაცხადა ვოლსკიმ.
აზერბაიჯანელი ჟურნალისტი აფგან მუხთარლი თბილისში 29 მაისს, საღამოს გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა. მუხთარლის ბრალი აზერბაიჯანის სისხლის სამართლის კოდექსის 318-ე (საზღვრის უკანონო კვეთა) და 206-ე (დეკლარაციის გარეშე დიდი ოდენობით თანხის გადატანა) მუხლებით აქვს წარდგენილი.