საპარლამენტო უმრავლესობის წევრი კობა ნარჩემაშვილი ციხეში გატარებულ დღეებს გადაცემაში„ინტერვიუ ვანიჩკასთან“ იხსენებს. მისი თქმით, ეს იყო თავიდან ბოლომდე პოლიტიკური ანგარიშსწორება. თუმცა დეპუტატი საპატიმროში გატარებულ დროს დაკარგულად არ მიიჩნევს, პირიქით თვლის, რომ ძალიან დიდი გამოცდილება მიიღო, რომელსაც თუ საშუალება მიეცემა პრაქტიკაში გამოიყენებს.
„არამარტო შინაგან საქმეთა მინისტრობის დროს მთელი ჩემი პროფესია დაკავშირებული იყო ციხესთან, რადგან რიგითი გამომძიებლობიდან დავიწყე, გამომძიებელს ძალაუნებურად გიწევს პატიმართან ურთიერთობა და კვირაში პრაქტიკულად ორი-სამი დღე მიწევდა ციხეში ყოფნა, პატიმრებისთვის ხან საქმის მასალების, ხან ბრალდების წაყენება.
მე მადლობელი ვარ განგების იმის გამო, რომ ესეც მაჩვენა. სწორი დასკვნები რომ გააკეთო, ალბათ რაღაც უნდა გამოსცადო. დღევანდელი გადასახედიდან ვთვლი, რომ ის გამოცდილება ჩემს აქტივშია და ეს ოდესმე ძალიან დამეხმარება ან მე, ან ჩემს ახლობლებს თუ საშუალება მომეცემა ის გამოცდილება, რომელიც უკვე მე სხვა სტატუსით გავატარე საგამოძიებო იზოლატორში, ძალიან დამეხმარება. ამასთანაც არ მაქვს ისეთი დამოკიდებულება, რომ როგორ მაკადრეს, რადგან იმპერატორებსაც გაუტარებიათ დრო ციხეში.
ძალიან დაღლილი ვიყავი, რადგან პრაქტიკულად წინასწარი დაკავების საკანში არც მიძინია. ციხეში როცა გადამიყვანეს, იმ ღამეს ძალიან ღრმად ჩამეძინა. თვალი რომ გავახილე, ძალიან ცუდი შეგრძნება იყო, როდესაც გავაანალიზე რეალურად სად ვიყავი. სწორედ ასეთივე განცდა დამეუფლა 2007 წლის 8 ნოემბერს, როდესაც ამჯერად ჩემს საძინებელში გავახილე თვალები, ტელევიზორი გათიშული, ინტერნეტი გათიშულია… ეს არის 7 ნოემბის დარბევის შემდეგ, როდესაც „იმედი“ დაარბიეს და აბსოლუტურად იგივე განცდა დამეუფლა. მაშინ მივხვდი, რომ არ აქვს მნიშვნელობა სად იღვიძებ კაცი საკანში თუ შენს საძინებელში, შესაძლებელია იღვიძებდე შენს საძინებელში და მაინც ციხეში იყო.
ჩემი საქმის წაკითხვის და შესწავლის სურვილიც არ მქონდა, რადგან ვიცოდი, რომ სამართლებრივი კატეგორიებით იქ მსჯელობა არ წავიდოდა. ეს არ იყო სამართლებრივი ხასიათის საქმე, სადაც შეგეძლო მუხლებით, დისპოზიციებით, რაღაცებით გემსჯელა, ვიღაც რაღაცაში დაგერწმუნებინა. ეს იყო თავიდან ბოლომდე პოლიტიკური საკითხი, პოლიტიკური ანგარიშსწორების თემა. ახლანდელი გადასახედიდან, მიუხედავად იმისა, რომ მაშინ წინააღმდეგი ვიყავი, ვთვლი, რომ ჩემი მეგობრების და ახლობლების გადაწყვეტილება, რომ მე რაც შეიძლება დროულად დამეტოვებინა ციხე, იყო აბსოლუტურად სწორი გადაწყეტილება, რადგან ცოტა ხანში დაიკარგებოდა ჯანმრთელობა და ძალიან დიდი შანსი იქნებოდა იმის, რომ სულხან მოლაშვილის ბედი გამეზიარებინა“, -ამბობს ნარჩემაშვილი.
კობა ნარჩემაშვილი, რომელიც შინაგან საქმეთა მინისტრის პოსტზე 2001-2003 წლებში მსახურობდა, ოქტომბერში საბაჟო პროცედურების დარღვევის და ავტომანქანების უკანონოდ განბაჟების ბრალდებით დააპატიმრეს.
დაკავების შემდეგ ნარჩემაშვილმა უარყო ბრალდებები და განაცხადა, რომ მისი დაკავება პოლიტიკური მოტივით მოხდა.