რაჭა-ლეჩხუმ ქვემო სვანეთის სახელმწიფო რწმუნებული პაპუნა მარგველიძე ცაგერისა და ლენტეხის მუნიციპალიტეტებში, ადგილობრივი ხელისუფლების წარმომადგენლებთან ერთად გზების თოვლისგან წმენდის სამუშაოებს გაეცნო.
ცაგერის მუნიციპალიტეტის ინფორმაციით, მხარის მასშტაბით აქტიურ რეჟიმში გრძელდება შიდა სასოფლო მნიშვნელობის საავტომობილო გზების თოვლისგან წმენდის პროცესი, რომელშიც ჩართულია 30 ერთეული ტექნიკა. ამ დროის მონაცემებით გაიწმინდა და გაიხსნა 159 სოფლის შიდა და მუნიციპალურ ცენტრთან დამაკავშირებელი გზა, გასაწმენდი რჩება 88 სოფლის გზა.
„გზების წმენდის პარალელურად მუნიციპალიტეტებში ცოცხალი ძალის მეშვეობით, მოსახლეობის უსაფრთხო გადაადგილების მიზნით, იწმინდება ადმინისტრაციული და სოციალური მნიშვნელობის ობიექტების მიმდებარე ტერიტორიები.
,,ენერგო პრო ჯორჯიას“ ჯგუფები ინტენსიურად მუშაობენ სხვადასხვა დაზიანებულ ლოკაციებზე ელექტრომომარაგების აღსადგენად. ამ დროისთვის ელექტროენერგიის მიწოდება შეწყვეტილი აქვს 4 სოფელს.
მხარის მასშტაბით თოვლის წმენდის პროცესი გრძელდება და ეტაპობრივად ყველა პრობლემურ მონაკვეთს სრულად მოიცავს, რათა უმოკლეს ვადებში აღდგეს მიმოსვლა და ელექტრომომარაგება“, – აცხადებენ ცაგერის მუნიციპალიტეტში.