„ახალი განთიადი ვენესუელისთვის,“ – ასე აღწერა აშშ-ის მაღალი რანგის დიპლომატმა კარიბის ზღვის აუზის ქვეყნის მომავალი მას შემდეგ, რაც შაბათს, კარაკასში ჩატარებული რეიდის შედეგად, აშშ-ის სპეციალურმა ძალებმა პრეზიდენტი ნიკოლას მადურო დააკავეს. თუმცა, იმ რვა მილიონი ვენესუელელისთვის, რომლებიც ბოლო ათწლეულის განმავლობაში ეკონომიკურ ნგრევასა და რეპრესიებს გაექცნენ, ორშაბათს ნიუ-იორკის სასამართლოს წინაშე მადუროს წარდგენით გამოწვეული სიხარული იმის გაცნობიერებამ გაანელა, რომ მისი ქვეყნის სათავეში კვლავ დამხობილი პრეზიდენტის გარემოცვა დარჩებოდა. არადა, მადუროს დამხობის შესახებ ცნობებმა თავდაპირველად დიასპორაში დიდი ზეიმი გამოიწვია. ადამიანებს ხმა უკანკალებდათ, როდესაც იხსენებდნენ სიდუხჭირეს, რომელსაც გამოექცნენ და ოჯახებს, რომლებიც სამშობლოში დატოვეს.
მიუხედავად იმისა, რომ ბევრი მათგანი სამშობლოში დაბრუნებაზე ოცნებობს, მათ მკაფიოდ განაცხადეს, რომ ბარგის ჩალაგებას ჯერ არ აპირებენ. უმეტესობამ უცხოეთში დარჩენისა და სახლში ფულის გაგზავნის გაგრძელების მიზეზად ქვეყნის განადგურებული ეკონომიკა დაასახელა. ზოგიერთმა კი ვენესუელის უსაფრთხოების სამსახურების მიმართ შიშსა და იმ გასამხედროებულ დაჯგუფებებზე გაამახვილა ყურადღება, რომლებიც შაბათს კარაკასის ქუჩებში დადიოდნენ, რათა მადუროს დამხობით გახარებული ნებისმიერი ადამიანი დაესაჯათ. „ვენესუელაში რეჟიმის ცვლილება არ მომხდარა, გარდამავალი პერიოდი არ დამდგარა“, – აღნიშნა ვენესუელელმა სოციოლოგმა და უფლებადამცველმა, ლიგია ბოლივარმა, რომელიც 2019 წლიდან კოლუმბიაში ცხოვრობს.
„ფრანს პრესს“. იგივე აზრი გამოთქვა ბოგოტაში (კოლუმბია) ვენესუელის საკონსულოსთან მდგომმა 35 წლის ალეხანდრო სოლორზანომაც, რომელიც ორშაბათს პასპორტის განახლებას ელოდა. „ყველაფერი ძველებურად რჩება“, – დასძინა სოლორზანომ, რომელსაც, ამ შემთხვევაში, მხედველობაში ჰქონდა აშშ-ის პრეზიდენტის, დონალდ ტრამპის გადაწყვეტილება, რომ მადუროს ადმინისტრაციასთან ემუშავა და არა დემოკრატიულ ოპოზიციასთან. მადუროს ყოფილმა მოადგილემ, დელსი როდრიგესმა ორშაბათს პრეზიდენტის მოვალეობის შემსრულებლის ფიცი დადო და იმ ადმინისტრაციის დროებითი ხელმძღვანელი გახდა, რომელშიც კვლავ შედიან ხისტი პოლიტიკის გამტარებელი შინაგან საქმეთა მინისტრი, დიოსდადო კაბელიო და გავლენიანი თავდაცვის მინისტრი, ვლადიმირ პადრინო ლოპესი.
ბევრ ვენესუელელში კაბელიო განსაკუთრებულ შიშს 2024 წელს არჩევნების შემდეგ დაწყებული პროტესტების ჩახშობის შემდეგ იწვევს, რომელსაც ის ხელმძღვანელობდა და რომლის დროსაც 2 400-მდე ადამიანი დააკავეს. ბევრი ვენესუელელი განსაკუთრებით შოკირებული იყო ტრამპის გადაწყვეტილებით, გარდამავალი პერიოდში უგულებელყო ოპოზიციის ლიდერი და ნობელის მშვიდობის პრემიის ლაურეატი, მარია კორინა მაჩადო. ევროკავშირმა ორშაბათს მოითხოვა, რომ ნებისმიერ გარდამავალ პროცესში ჩართული ყოფილიყვნენ მაჩადო და მისი შემცვლელი კანდიდატი 2024 წლის არჩევნებში, ედმუნდო გონსალეს ურუტია (რომლის გატაცებაში მადუროს ადანაშაულებენ). ბუენოს-აირესში მცხოვრები ექსპერტი საიმიგრაციო საკითხებში, 47 წლის ანდრეა მიიჩნევს, რომ მაჩადოს დრო ჯერ არ დამდგარა.
„სანამ ტრამპი არ დაინახავს, რომ სიტუაცია მის კონტროლს ექვემდებარება, სანამ ყველა ამ დამნაშავეს ხელში არ ჩაიგდებს, ის ვერ შეძლებს ხელმძღვანელად მარია კორინას დანიშვნას, რადგან ეს მგლებისთვის მისი მიგდების ტოლფასი იქნება“, – განმარტა მან.
„სხვა გზა არ არსებობს“
პოლიტიკურმა ანალიტიკოსმა, ლუის პეჩემ, რომელიც გასულ წელს ბოგოტაში შეიარაღებულ თავდასხმას გადაურჩა (რაც სავარაუდოდ პოლიტიკური ანგარიშსწორება იყო), ასევე მხარი დაუჭირა მოლაპარაკებების გზით ძალაუფლების გადაცემას. „ჩვენ ამას უნდა შევხედოთ, როგორც ერთიან პროცესს. ამ ეტაპზე საჭიროა, რომ სახელმწიფო აპარატის ნაწილი თანამდებობაზე დარჩეს“, – განუცხადა პეჩემ „ფრანს პრესს“, ვენესუელის გარდამავალ პერიოდზე საუბრისას. ესპანეთში მოღვაწე ვენესუელელმა უფლებადამცველმა, ტამარა სუჯუმაც აღნიშნა, რომ, რეპუტაციაშელახული გუნდის ქვეყნის სათავეში დატოვება (მოკლევადიან პერსპექტივაში) აუცილებელი ბოროტება იყო.
„ისინი არიან პერსონები, ვისთანაც ტრამპის ადმინისტრაცია გარდამავალ პერიოდში აწარმოებს მოლაპარაკებას, რადგან სხვა გზა არ არსებობს“, – განუცხადა მან ესპანურ esRadio-ს. ფანჯრების ხელოსანი, 46 წლის ედვინ რეიესი, რომელიც ბოლო რვა წელია კოლუმბიაში ცხოვრობს, ამბობს, რომ დაბრუნებაზე მაშინ იფიქრებს, როცა ვენესუელა „სრულიად თავისუფალი“ იქნება: „ჩვენ იმდენ ხანს ველოდით, კიდევ ოთხი ან ხუთი თვეც რომ მოვიცადოთ, ამით არაფერი დაგვაკლება.“
https://www.afp.com/en/agency/our-commitments/afp-charters