“პრეზიდენტი შევიდა ჩიხში, მან უარი თქვა ჩვენს შეთავაზებაზე”

პრეზიდენტი შევიდა ჩიხში და ამის შედეგია ის, რომ მან სამწუხაროდ, უარი თქვა ჩვენს შეთავაზებაზე, – ამის შესახებ საქართველოს პარლამენტის თავმჯდომარე ირაკლი კობახიძემ დღეს გამართულ პრესკონფერენციაზე განაცხადა.
ირაკლი კობახიძის განმარტებით, პრეზიდენტისთვის საკონსტიტუციო ცვლილების პროექტზე დებატები არ შეუთავაზებიათ.
”ჩვენ პრეზიდენტს შევთავაზეთ ერთად დავმსხდარიყავით საზოგადოების წინაშე ღია ეთერში, საქართველოს პრეზიდენტი და პარლამენტის თავმჯდომარე და ერთად გვესაუბრა საკონსტიტუციო ცვლილებების არსის თაობაზე. ეს იყო ჩვენი შეთავაზება და კიდევ ერთხელ მინდა გამოვთქვა ჩვენი მწუხარება იმის გამო, რომ პრეზიდენტმა ეს შეთავაზება არ მიიღო. ეს ცხადყოფს იმას, რომ ჩვენი პოზიციები არის ძალიან მყარი და პრეზიდენტის პოზიციები არის ძალიან სუსტი”, – განაცხადა პარლამენტის თავმჯდომარემ.
როგორც კობახიძემ, აღნიშნა, საქართველოს პრეზიდენტმა ამ პროცესში თავიდანვე არასწორი გზა აირჩია.
”ეს იყო საკონსტიტუციო კომისიასთან და საქართველოს პარლამენტთან დაპირისპირების გზა. მას შემდეგ, რაც დადასტურა ამ რეფორმის წარმატება, ბუნებრივია, პრეზიდენტი შევიდა ჩიხში და ამის შედეგია ის, რომ მან სამწუხაროდ უარი თქვა ჩვენს შეთავაზებაზე. ჩვენ კიდევ ერთხელ ვადასტურებთ ჩვენს მზადყოფნას, რომ ამ ფორმატში მივიღოთ მონაწილეობა”,- განაცხადა პარლამენტის თავმჯდომარემ.