სრულიად საქართველოს კათოლიკოს-პატრიარქთან დეკანოზ გიორგი მამალაძის ოჯახის წევრების შეხვედრის აუდიოჩანაწერის დაბლოკვასთან დაკავშირებით, საქართველოს საპატრიარქო განცხადებას ავრცელებს. საპატრიარქოს ინფორმაციით, 25 ივნისს მათ საიტზე აუდიოჩანაწერი აზერბაიჯანული კომპანიის მოთხოვნის საფუძველზე დაიბლოკა.
”როგორც ვიუწყებოდით, დეკანოზ გიორგი მამალაძის ოჯახის საპატრიარქოში შეხვედრის სრული აუდიოჩანაწერი, რომელიც 23 ივნისს გამოვაქვეყნეთ, 25 ივნისს დაიბლოკა პორტალ youtube-ზე. გაირკვა, რომ ჩანაწერი დაიბლოკა აზერბაიჯანში არსებული მულტიმედიური კომპანია TiVi media-ს მოთხოვნის საფუძველზე.
ამის მიზეზად სახელდება ის გარემოება, თითქოსდა საქართველოს საპატრიარქომ დაარღვია საავტორო უფლება და უნებართვოდ გაავრცელა TiVi media-ს კუთვნილი ჩანაწერი. ჩვენს მიერ youtube-ს გაეგზავნა შეტყობინება, სადაც განმარტებულია, რომ საავტორო უფლება საქართველოს საპატრიარქოს ეკუთვნის.
შევნიშნავთ იმასაც, რომ კომპანია TiVi media-სთან თანამშრომლობს ქართულ ტელეარხთან „TV პირველი“. როგორც „TV პირველის“ წარმომადგენელმა განაცხადა, ჩანაწერის დაბლოკვა მათგან დამოუკიდებლად მოხდა, რომ ეს გაუგებრობის შედეგია და მუშაობენ თავის პარტნიორთან ამ პრობლემის მოსაგვარებლად. ამჟამად ჩანაწერის მოსმენა კვლავ შესაძლებელია ჩვენს საიტზე. იმედს ვიტოვებთ, მსგავსი ფაქტი მომავალში აღარ განმეორდება”, – ნათქვამია საპატრიარქოს განცხადებაში.
შეგახსენებთ, რომ 23 ივნისს საპატრიარქოს ოფიციალურ ვებ-გვერდზე გავრცელდა აუდიოჩანაწერი, რომელიც დეკანოზ გიორგი მამალაძის ოჯახისა და პატრიარქის შეხვედრას ასახავდა. 25 ივნისს კი ჩანაწერი დაიბლოკა, თუმცა ის საიტზე მეორე დღესვე აღდგა.