თბილისში პროექტები აქტიურად ხორციელდება და სამომავლოდაც არაერთი სამუშაოა დაგეგმილი, – ამის შესახებ თბილისის მერმა, კახა კალაძემ პარლამენტის ვიცე-სპიკერის, სოზარ სუბარის მიერ კორუფციასთან ბრძოლასთან დაკავშირებით გაკეთებულ განცხადებაზე დასმული კითხვის საპასუხოდ აღნიშნა.
მისი თქმით, კორუფციის ფაქტების არსებობის გამო, ქვეყნის მასშტაბით მუნიციპალიტეტებში პროექტები რომ შეჩერდა, ეს თბილისს არ ეხება.
„თქვენი აზრით, რამე შევაჩერეთ? ყოველდღე დადიხართ ჩემთან ერთად და ეცნობით სხვადასხვა პროექტს, მაგრამ არ აშუქებთ იმ სამუშაოებს, რასაც ჩვენ ვახორციელებთ, რადგან არ გაინტერესებთ. მაგალითად, დღეს სადაც ვართ, გლდანის მერვე მიკრორაიონში, რაიონული გამგეობა ასრულებს აღნიშნულ პროექტს. რამდენიმე დღის წინაც ვიყავით სხვა პროექტზე და ა.შ. შესაბამისად, მგონი, თბილისთან დაკავშირებით კითხვები არ არსებობს. უამრავი რამე გაკეთდა ბოლო წლებში, უამრავი რამ კეთდება და სამომავლოდაც ბევრი მნიშვნელოვანი პროექტი გვაქვს დაგეგმილი“, – აღნიშნა კახა კალაძემ.