პარლამენტის ვიცე-სპიკერის გია ვოლსკის განცხადებით, ვენეციის კომისიის პრეზიდენტის, ჯანი ბუკიკიოს კრიტიკული განცხადება მოსალოდნელი იყო, რადგან საკონსტიტუციო ცვლილებებთან დაკავშირებულ პროექტში გარკვეული სიახლეები იქნა ასახული.
„ბუკიკიოს ეს განცხადება მოსალოდნელი იყო, რადგან პროპორციული სისტემა, რომელიც ჩვენ 2024 წელს შევიტანეთ პროექტში, გარკვეულწილად სიახლეა იმ თალსაზრისით, რომ მოყოლებული 90-იანი წლებიდან, დამოუკიდებელი საქართველოს პირობებში არც ერთ ხელისუფლებას ეს ნაბიჯი არ გადაუდგამს. ყველა ცდილობდა თავი აერიდებინა ამ გადაწყვეტილებისთვის. ძალიან ბევრ ჩვენთაგანს მიაჩნია, რომ 2020 წლისთვის რთული იქნება პროპორციული სისტემის პირობებში კოალიციური გადაწყვეტილების მიღება, თუნდაც მთავრობის შექმნის საკითხებთან დაკავშირებით. ამის გარდა პოლიტიკურ პარტიას, რომელიც 2020 წლისთვის მიიღებს უმრავლესობას, ექნება მეტი შანსი თავისი რიგები შეავსოს მაჟორიტარებიდან. აქედან გამომდინარე ექნება შესაძლებლობა უმრავლესობა შეადგინოს გამარჯვებულმა პარტიამ და უპრობლემოდ შეძლოს ქვეყნის კრიზისისგან დაცვა. ჩვენ წმინდა პრაქტიკული გადაწყვეტილება მივიღეთ და არანაირად არ განვიხილავ ამას ,,ქართული ოცნების“ ინტერესად,“ – განაცხადა გია ვოლსკიმ.